3963/2023-2024

Dated Aizawl, 26th February 2024: Prime Minister Pu Narendra Modi-a’n India ram chhung hmun hrang hranga railways project hrang hrang 2,054 hna bul ṭanna tur lungphum a phum leh hna thawh zawh tawh a hawnna hun chu vawiin khan Sairang Station aṭangin biakhmuhtheihna (video conference) hmangin Mizoram Sawrkara Transport Minister Pu Vanlalhlana leh Lok Sabha MP Pu C. Lalrosanga te'n an chhim.

Hemi puala Sairang Station-a hun buatsaihah Transport Minister Pu Vanlalhlana chuan Prime Minister-in railways project hrang hrang ₹ vaibelchhe 41,000 hu a hawnna programme a chhim thei chu lawmawm a tih thu a sawi a. Km 51.38-a thui Bairabi-Sairang Broad Gauge Line siamna tura December ni 15, 2015 aṭanga hna thawh ṭanah railway station pali – Sairang, Mualkhang, Hortoki leh Kawnpui te siam mek a nih thu sawiin, tun dinhmunah he ‘national project’ hi 100-ah 92 zawh tawh a nih thu leh kumin October 2024 hian thawh zawh hman beisei a nih thu a sawi a. Nikum July ni 24 khan Ministry of Railways-in km 223-a thui rel kawng Sairang to Hmawngbuchhuah atan Final Location Survey a rawn sanction thu leh he project chungchang hi sawrkar pawhin a ngaihtuah chhunzawm mek thu sawiin, rel lo luh hunah in sakna bungrua emaw, bungraw dang dang pawh man tlawm zawkin kan chaw lut thei tawh ang a, khualzin veivak tan pawh awlsam leh man tlawm zawkin a zin theih tawh dawn a ni, a ti a. He rel lo lut turin hna tam tak a rawn ken tel tur chu hnam dang thawh atan dah lo va, a ram mite ngeiin thawh tum a pawimawh thu te, Act East Policy hnuaia ram dang nen insumdawn tawnna kawtchhuah kan nih huna ei zawnna atana hmang thei tura hma lak a ṭul thu te sawiin, mipuite'n kan theihna kan tah hriam loh va, hmathlir (vision) leh tih tur hmachhawp (mission) nei lova kan lo thlir liam ve mai mai chuan remchanna (opportunity) lian tak kan hloh dawn a ni, a ti a. Hmasawnna lo thleng tur chu ram mipuite'n a ṭha zawnga chhawr ngei turin tun aṭanga nasa taka lo inpuahchah a ṭul a ni, a ti.

Lok Sabha MP Pu C. Lalrosanga chuan Mizorama rel kawng siamna leh a kaihhnawih hnaahte tualchhung mite a tam thei ang ber chhawr a ṭul thu leh Railways hna atana Mizo ṭhalai train theih ang angte train a ṭul thu sawiin, hemi atan hian Mizoram sawrkar leh  Railways thuneitute hma la turin a ngen a. Relin Sairang a lo luh a, Hmawngbuchhuah thlenga a kal hunah phalna nei lo leh dan lo anga hnam dang rawn lut an awm lohna tura ruahmanna siam turin Mizoram Sawrkar leh Railways thuneitute ngenin, khauh taka dan kengkawh turin a ngen a. Rel kawng leh a bungruate venhim a ṭul thu sawi bawkin, Mizorama lut tur rel kawngte tihchhiat leh dan chah phal tur a ni lo, a ti. Tun kum 10 vel kal ta chhunga Railways lamin hma an sawn dan te lawmawm a tih thu sawiin, Pu C. Lalrosanga chuan hemi kawnga Prime Minister Pu Narendra Modi leh Railways Minister Pu Ashwini Vaishnaw-a te hma lakna lawmawm a tih thu a sawi a. Sairang aṭanga Hmawngbuchhuah thlenga rel kawng siam tum chungchangah Parliament-ah zawhna a lo zawh tawh thu sawiin, senso a san dawn em avanga Railways-in an tum tak loh thu hriattir a nih hnua tharthawh a ni leh ta chu lawmawm a tih thu a sawi a. Km 223-a thui, Lawngtlai District-a Hmawngbuchhuah thlenga rel kawng siam tum mek hian ram dangte nena insumdawn tawnna leh bungraw phurhna kawngah Mizoram leh state dangte tan hlawkna tam tak a thlen thei dawn a ni, a ti.

He hunah hian sawrkar mi pawimawh dangte leh Railways lam hotute pawh an tel a. Prime Minister-in project hawnna hun a hman hmain cultural programme buatsaih niin, tualchhung zaithiam hrang hrang aṭangin zai ngaihthlak a ni a. Hemi hnu hian central lam hun ruahman chu video conference hmanga chhim niin, Pu Ashwini Vaishnaw, Minister of Railways, Communications, Electronics & Information Technology, Government of India chuan inlawmna thu a sawi a. India ram chhung hmun hrang hranga Railways Station 554 leh Road Over Bridge/Under Pass 1,500 lungphum phumna, hawnna leh ram tana hlanna chu PM Pu Narendra Modi-a’n hmangin, hemi hnu hian thu a sawi zui nghal bawk a ni.