2402/2025-2026

Aizawl the 26th November, 2025 : Vawiin khan Transport Minister Pu Vanlalhlana an Mizoram Truck Owners' Association Office thar Bawngkawn ami chu a hawng a. He hawnna inkhawm hi Pu B. Lalzarzova, President MTOA in a kaihruai a, Rev K. Lalrinmawia'n hunserh hmangin Pu Dina Tlau, General Secretary MTOA hnen atangin Report ngaihthlak a ni.

Minister chuan thusawiin, MTOA in office thar tha tak an nei thei chu a lawmpui thu a sawiin hawn sak tura an ngenna te zahawm a tih thu leh lawmawm a tih thu a sawi.

Minister chuan Truck neitu leh khalhtute chu kan ram sum chetkual dan (Economy) inghahna pawimawh tak an ni, tih sawiin mipui nitin mamawh insak bungrua leh bungraw pawimawh chi chi hrang hrang chetvelna kawngah mawhphurna pawimawh tak neitu an nih thu a sawi a. Bungrua a bikin, essential commodities phei chu chatlak lova a hun taka a thlen a pawimawh hle thu sawiin engemaw vanga an hna a chatlak palh thinna chuan mipui nitin nunphung a nghawng nasat thin hle thu a sawi bawk a ni. Transport Minister chuan MTOA member-te hnathawh chu chhungkaw tin a thleng a, chhungkaw tam tak eizawnna an chungah a innghat a, sawrkar Policy leh Project tih hlawhtlin thlengin an pawimawh em em a ni, a ti bawk.

Pu Vanlalhlana chuan Sawrkarin truck neitu leh khalhtute harsatna a hre reng a, Kawnpui leh Khamrang inkar kawngpui pawh NHIDCL kutah awm tawh mahse PWD-in a vilpui thin a. Khawthlang lama an mu tan, NH44A hna hmabak pawh Ministry-in cheng Vaibelchhia 134 an rawn sanction tawh thu leh tunah hian tender chhuah mek a nih thu a sawi a. He kawng atana 'One Time Improvement' thawhna tur cheng vaibelchhe 48 pawh Regional Office ah a inchiah mek thu a sawi bawk. 

Minister chuan ATL Road pawh hna thawh tan theih a nih phat atangin official-ten hma an la nghal a, Lunglei khawpui chhung kawngpui chu Krismas hmaa blacktop tum a ni a, Aizawl khawchhung resurfacing pawh kalpui mek a nih thu tarlangin nakum March thla tawp lama zawh theih an in beisei thu a sawi a, Supreme Court atangin a khat tawkin thil tih tihhlawhtlin tur ruahmanna a rawn siam thin a, Tun dinhmunah Speed Limiting Device vuah vek turin a rawn ti a, Hei bakah hian Transport Department hmalaknain weighbridge hmangin bungraw phur truck-te buk thin a ni chu phurrita la mai lova, an him tlanna tur zawkte, kan kawngpui a tlo zawkna tur a ni tih hre thar turin a chah bawk. 

Pu Dina Tlau, General Secretary MTOA report tarlan danin tun dinhmunah MTOA ah hian OB mi 7, Executive Committee member 14, Sub Headquarters 4 (Kolasib, Champhai, Lunglei leh Lawngtlai) Member 440 leh Truck 600 an awm mek thu a sawi. 

He hun hi Aizawl City Bus Owners' Association aiawhte, Mizoram Commercial Vehicle Union aiawh te, Bawngkawn Local Council leh Bawngkawn West Local Council aiawh te, MHIP Bawngkawn Branch te leh MUP Bawngkawn ten an telpui a ni.