2403/2025-2026

Aizawl, the 26th November, 2025: Amazing Namaste Foundation buatsaih India hmarchhak state-te zirchianga hriat chian lehzual tuma lokal 'New Bike Expedition - Northeast on Wheels' member-te pualin vawiin tlai khan Larsap General (Dr) Vijay Kumar Singh, PVSM, AVSM, YSM (Retd) chuan Durbar Hall, Raj Bhavan-ah cultural programme leh inkawmhona hun a buatsaih. 

Larsap General (Dr) Vijay Kumar Singh chuan hmarchhak state hriat chian chaka lo zin 'New Bike Expedition - Northeast on Wheels' member-te chu Mizoram state mawi leh nuam takah thinlung taka a lo lawm thu a sawi a. Champhai District hmun mawi tak an tlawh thei chu lawmawm a tih thu sawiin, district dang mawi leh nuam tak takte pawh tlawh chhunzawm zel turin a chah a. Mizo mipuite chu kawm nuam leh hawihhawm tak, tanpui ngaite pui tura inpeih reng an nih thu sawiin, Mizoramin khualzin hip tura theihna nasa tak a neih thu leh Kût tlawh manhla tak tak a buatsaih thin thu a sawi bawk.

Larsap chuan Amazing Namaste Foundation thiltum chu ropui a tih thu sawiin, Mizoram rawn tlawhtute chu an chenna hmun theuha an kir hunah pawh midangte Mizoram leh hmarchhak state dangte chanchin mawi leh tha hrilh a, rawn kal ve ngei tura hmin turin a chah a. Amah ngei pawhin kum 1971 ah a tum khat nan hmarchhak state a tlawh thu leh state tinte'n danglam bikna mawi tak an neih theuh thu a sawi bawk. 

Pu Atul Kulkarni, Chairman, Amazing Namaste Foundation chuan Larsap-in Raj Bhavan-ah anmahni lawmna hun a buatsaih chu lawmawm a tih thu a sawi a. Mite'n hmarchhak state an hriat chian theih nan Amazing Namaste Foundation-in kawng hrang hranga hma a lak thu sawiin, New Bike Expedition chu heng zinga hmalakna pakhat a nih thu a sawi a. Adventure Ride mai a nih loh thu leh hmarchhaka chengte, a ram pianhmang leh hmunhmate hriat chian nana buatsaih an nih thu a sawi a. An kalna hmun apiangah a remchan dan ang zela khawtual mite an kawm thin thu sawiin, state Sawrkarte tawiawm thinnaah lawmthu a sawi bawk.

He hunah hian rider-te atangin an tawnhriatte ngaihthlak a ni a. Lily Veng Cultural & Drama Club te'n hnam lam mawi tak tak an entir a, Larsap-in Mizoram tlawha rawn zinte kawmin hun hlimawm tak hman a ni a. Raj Bhavan Upper Lawn-ah Mizo hnam ziarang pholanna stall-te siam a ni bawk. 

He hunah hian Aizawl Thunders, Lushai HOG leh Triumph Mizoram member-te bakah hemi kaihhnawih tualchhung mi sawm bikte an tel a ni.