Tourism Minister Pu S. Hiato, Kolkata a thang mek chu vawiin hian Travel India Summit, Kolkata a neihah khual zahawm a ni.

Pu S. Hiato chuan Mizoram chu India rama State ralmuang ber anih angin Tourist te tlawh atana hmun duhthusam a nih thu a sawi a. Mizoram chu tlangram nuam tak, khuanu kutchhuak khawih chet loh mawi tak tak awm na, zin mi tam takin an la tlawh pawh loh, Tourist te tana hmun nuam a ni, a ti a. Mizoram tlawh tur hian sum tam tak sen a ngaih lo a, Mizo mipui te leh Mizoram sorkar chu englai pawhin Tourist te tan an inhawn reng a ni, a ti bawk. Minister chuan Tourism lama thang mek Mizoram chu hmabak tam tak a la neih te tihlawhtling turin India sorkar leh palai dang te thawhhopuiah a sawm a. India mi tam takin Mizoram an hrechiang lo lutuk leh ram chhung khawpui dang Delhi, Mumbai-ah te a zin changa Mizoram chu khawiah nge a awm tih zawhna a la tawng fo thin erawh chu pawi a tih takzet thu a tarlang nghal bawk a ni.

He Travel India Summit neih mekah hian China, Peru, Myanmar leh ram dang tam tak atangin palai an tel a. Union Minister Subodh Kant Sahay pawhin he summit hi a hmanpui a ni. Naktuk hian Mizoram Governor Pu MM Lakhera chu he Summit-ah hian khuallian a ni ang.