Vawiin khan Mizoram chhunga hnam hrang hrang te Other Backward Classes (OBC) a telh tur an nih leh nih loh chungchang ngaihtuah tur a Supreme Court thupek anga din Permanent Body te chu an Chairman Pu Lalrinawma, Law Commission Chairman ni bawk hovin Secretariat Conference Hall-ah an thukhawm.

Chairman Pu Lalrinawma chuan Mizorama cheng hnam tlem zawk te humhalh leh India danpuiin a phalsak, an chanvo humhim hi sorkar duh dan a ni a ti a. Amaherawhchu ram lei lung fate nen inhriatthiamna nei tlanga, thlamuang taka hnam tenau zawk ten an chanvo dik tak an chan theih an duh avang zawkin fimkhur leh uluk takin hma an la a. Chhaih khawtlai mai mai ni lovin mumal taka thil tih an duh zawk avangin muangchang angin an lang a ni, a ti bawk.

Meeting-ah hian 26.1.1950 hmalama Mizorama khawsa Gorkhali te leh an thlahte,  OBC anga pawm (recognise) an dilna ngaihtuahho a ni a.  Kumin January ni 28 a an meeting thurel bawhzuiin District hrang hrang atanga Gorkha Electoral Roll a hming chuang zat an lak khawm te, Gorkha te khawsakna ram chhung State 8 a Gorkhali te dinhmun, OBC anga puan an nih leh nih loh te bakah State sorkar hnuaia hna dil theihah te Reservation an pek leh pek loh te thlir ho a ni a. An thurel te hi thuneitu sang zawk hnenah thlen leh turin an dah a ni.