Chief Minister Pu Lal Thanhawla chuan ‘Mizo tawng hman dik hi kan hnam hnuk khawih anih vangin kan ngai pawimawh tur a ni’ a ti. He thu hi Art & Culture Department buatsaih  ‘Workshop on Mizo Tawng Hman Dik’ tih vawiina I&PR Conference Hall-a neiha a sawi a ni.

Chief Minister chuan tunlaia Mizo tawng kan hmanna ah ngaihpawimawh leh ngaihmawh tur a tam hle a ni tiin, hei hi mi tam takin hrehrang lova; ngaipawimawh tur ngaimawha, ngaimawh tur ngaipawimawh leh si an awm hi Mizo tawng hman fimkhur a tulzia tilangtu nia a hriat thu a sawi a. Mizo tawng dikhlel deuha hman thin hi a ngaimawh thinzia sawiin, chumi siam tha tur zawnga sawihona leh zirhona, hetiang workshop buatsaih ani chu thil inhmeh tak leh lawmawm tak a ni a ti.

Chief Minister chuan tawng hi Pathianin mihringte hnena a thil pek pawimawh berte zinga mi a nih avangin a hman dik hi kan tum tur a ni a ti a. Chanchinbute, TV leh mipui hmaa thusawi tuten Mizo tawng dik hman mai duh tawk lovin, a punctuation thlenga hman dik kan tum tur a ni a ti. Hei hian thangthar lokal leh zel tur tena tawng dik  an rawn zir nan leh an hriat nan thil tul pawimawh tak a ni a ti. Chuvangin a hmanna leh a hman dan kan tihchhiat vek hma hian a siam that hi kan tih tur a ni a ti.

Pu Hawla chuan vawiina workshop  buatsaih hi a bul tanna chauha a ngai thu sawiin, hun dangah la tih fo nise tih a duhthu a sawi a. Workshop a tel zawng zawngte leh mithiam sawmbik, resourse persons ten  he hun hi duhthawh taka hmangin, Mizo zawng zawng tana hlawhtlinna rah a chhuah ngei theih nan duhsakna a hlan a ni.

Workshop hun hmasa kaihruaitu  Art & Culture Minister Pu P.C.Zoramsangliana chuan nikum 2010 September thlaa MJA te puala ‘Mizo tawng dik hman dan’ tih thupui hmanga seminar buatsaih alo nih tawh thu a sawi a.Chawhnu lam workshop Dr.R.L.Thanmawia kaihhruaina hnuaiah, Resourse Person Pu Chhuanliana, Bethlehem Vengthlang(BVT) in “Tunlaia Mizo tawng tualleng hman dik loh leh a hman dan dik” tih thu sawiin, resourse person dang Pu C.Chhuanvawra’n “Khua, Lui, Tlang leh Mizo thil lam diklo leh a lamdan dik” tih thu a sawi bawk a. Sawihona neih chhunzawm nghal a ni. Tel tura sawmte zingah MJA memberte, electronics media persons leh tranlators te atangin mi 70 chuang an tel a ni.