4669/2024-2025

Aizawl dated 17th March 2025: Tukin khawvar hma khan Treasury Square-a Assembly House leh Directorate of Information & Public Relations inkar step-a chawhmeh bazar-ah kangmei a chhuak a. Fire & Emergency Services leh khawtlang mipuiin thehtawp an chhuah hnu zing dar 7:30 vel khan thelh mih a nih.

Aizawl District Disaster Management Authority Incident Report-a a lan danin tukin zing dar 3 bawr vel khan Treasury Square Chawhmeh bazar-ah kangmei a chhuak tih hi hriat a ni a. Kangmei thelh mih a nih hnu a chhinchhiah danin step sir a dawrte 63 bawr vel leh Thingpui dawr chu a kang ral vek a. Pi Thanzami Tochhawng building chhawng chung ber a thing a rel, PAMRA Office pawh a kang chhe vek a ni. I&PR Directorate building tukverh engemaw zah a keh a, AC khawl leh parda bak ah tui pipe leh septic tank pipe sawr chhia a awm nual a, Electric Grid line chhia a awm bawk a ni.

Treasury Square chawhmeh bazar kangmei chhuahna hi Dr. Vanlalthlana, I&PR Minister, Pu F.Rodingliana, P&E Department Minister, Pu Lalnghinglova Hmar, Sport & Youth Services Minister leh AMC Mayor, Deputy Mayor, Khatla South leh Venghlui ward hruaituten a hmun an tlawh nghal a ni.