G.B.Mukherjee, Secretary to the Govt. of India, Tribal Affairs chuan nimin tlai khan Lawngtlai atangin Saiha a thleng. Amah lo hmuahna Saiha Bazar Traffic Point a neih ah Dr Rakhu, President MTP (H) chuan lawmna thu sawiin MTP, MCHP, leh MSO ten hnamlam hmuhnawm tak an entir bawk.
Saiha Circuit House-ah Pu S.Hiato, PHE Minister, Pu Kunal, IAS District Bawrhsap leh Pu S.Khipo, CEM, MADC bakah Department hrang hrang hotute leh Chanchinbu miten an lo hmuak bawk a ni. Amah lawmna inkhawm tawi Circuit House Saiha-a buatsaih hi Pu Kunal IAS District Bawrhsap chuan a kaihruaia, Pu F.C. Zase, Chairman, MADC Saiha chuan Saiha District tana thil pawimawh hrang hrang te a hnenah a thlen a, Pu Hiphei, Vice President, MPCC pawhin thu sawiin Mara ram mipuiten a laka rinna leh beiseina an nghah takzet thu a sawi bawk a ni. Pu S.Khipo, CEM, MADC in MADC hminga thilpek hlanna a nei bawk. G.B. Mukherjee, Secretary to the Govt. of India, Tribal Affairs chuan amah lo hmuaktute hnenah thu sawiin District Council Area huam chhunga mi chengte dinhmun leh in enkawl dan zirchiang tur a lokal anih thu a sawi a, an mamawh a hnena an thlen te chu a tih theih chinah chuan theihtawpa bawhzuia tihhlawhtlin sak ngei a tum thu a sawi bawk, District Council pathum te tan Lawngtlai-a Workshop an buatsaih chu Ministry pawimawh tak tak a Secretary te berawn chunga buatsaih anih thu a sawi bawk. Tribal Affairs Secretary hian vawiin hian Phura zawl leh Palak Dil te a tlawh dawn a, Pu Hiphei, Vice President, MPCC pawhin a tawiawm a ni.
