No.3312/2021-2022

Aizawl, the 8th December 2021: Vawiin chawhma khan Dr K. Bechhua, Minister of State, Social Welfare & Tribal Affairs Department chuan Mc Cabe Hall, Aijal Club-ah Ni 4 chhung awh tur, Tribal Art & Craft Festival chu a duh apiang te chhim theih turin a hawng a. He kutpui hi of Azadi ka Amrit Mahotsav hmalakna kal zel niin Ministry of Tribal Affairs, Government of India leh Social Welfare & Tribal Affairs Department, Government of Mizoram te thawhhona hnuaiah Aizawl Art Gallery in a huaihawt a ni.

Dr K. Bechhua chuan vawiina kut hawn tak chu Azadi ka Amrit Mahotsav hnuaia Social Welfare & Tribal Affairs Department in programme 11 a buatsaih tur zinga pakhat leh a bul tanna a nih thu a sawi a. Minister chuan he kutpui buatsaih mek hi hlut saka tlawh theuh turin mipuite a sawm a. He hunah hian kan kuthemthiam te thilsiam hlutsak leh chawisan sak pawimawhnate pawh a sawi bawk a ni.

Dr K. Bechhua chuan Mizoram sawrkarin Ministry of Tribal Affairs hnuaiah kan tribal nun ziarang pholanna, humhalhna leh tih hmasawnna turin chak takin hma a la chho mek tih a sawi a. Tunah hian project lian tham tak tak kalpui mek a ni a ti. Mizoram hmun hrang hrangah hmasawnna ruhrel lian tak tak thawh chhoh mek a nih thu a sawi a. Tunah hian Kelsih hmunah Social Welfare & Tribal Affairs Department in Ministry of Tribal Affairs hnuaia project liantham tak tak 2 a nawrchhuah pawh tluang takin thawh mek a nih thu leh nakkumah heng hmasawnna ruhrel lian tak tak te chu hawn theih a nih tur thu a sawi bawk.

Tribal Art & Craft Festival-ah hian lemziakthiamte, puantahtute, kuthemthiam leh kermawi lam thiamte te chuan an kutchhuak mawi tak tak te chu a tlawhtute lei theih turin an pho chhuak a. Festival neihna hmun hi December 8 atanga December 11 thleng hian nitin zing dar 10 leh tlai dar 4 inkarah a duh apiang te tlawh theih turin hawn a ni a. Lemziak mawi tak tak te, puanchei leh kuttah thil hrang hrang, kermawi chi hrang hrang, bungraw tah chi hrang hrang leh hnathawhna hmanraw tangkai tak tak te lei theih turin zawrh a ni.

Tribal Art & Craft Festival hawnna inkhawm hi Pi A. Vanlalzawni, Director, SW&TA in a kaihruaia. He hunah hian a huaihawttu lam atangin Pu Laltanpuia, Chairman, Aizawl Art Gallery in report a pe a. He hun buatsaih a nih dan leh SW&TA in programme dang a buatsaih chhoh zel tur chungchangte Pi C. Zodinpuii, Dy Director & Nodal Officer, SW&TA hnen atangin ngaihthlak a ni bawk ani.