No.3311/2021-2022

Aizawl, the 8th December 2021: Nimin chawhnu khan Joint Director (Malaria) cum State Programme Officer (VBD) kaihhruaina hnuaiah, National Vector Borne Disease Control Programme (NVBDCP), Mizoram chuan tunlaia Dengue natna hluar mekna Mission Vengthlang Local Council Area-ah Dengue natna chungchang inzirtirna “Follow-up & Sensitization Programme” hmang chhunzawmin Council leh Local Level Task Force te nen hun an hmang ho.

He programme ah hian Dr. Lalremmawii, Joint Director (M) cum State Programme Officer (VBD) chuan Dengue natna leh inven dan te sawifiahin Dengue natna hrik pu darh tu Thosi hian he natna hrik hi ni 25 – 30 chhung a pai theih avang leh 4 km bial a zau an thlawh kual theih avangin mipuite he natna laka inven leh do kawngah kan pawimawh ber a ni tiin kalkhawmte chu uluk taka hmalakna siam turin a chah.

He programme-ah hian Jt. Director (M) cum SPO (VBD) leh Officials dang dang ten thu sawina leh zirtirnate neiin; Mission Vengthlang Area-ah Source Reduction Drive bakah Public Awareness neih zui tura ruahhman a ni a. Mipuite hriat tur pawimawh te a hnuaia tarlan ang hian sawi lan a ni.

Khawsik, lu na, Ruhchuktuah na, vuna sen thek thek Dengue Symtoms anga ngaihtheih nei zawng zawng te chuan sub-center emaw damdawi in pan vatin thisen exam tur a ni. Sawrkar hnuaiah Dengue Test theihna hi Civil Hospital, Aizawl leh Lunglei-ah te a awmin, Hospital dang – UPHC, PHC leh hmun danga thisen lakte pawh Dengue an ni ngei em tih finfiah turin Civils Hospital, Aizawl ah leh Lunglei ah te thawn thin a ni.

* Mahni in bul leh a vel te fai taka enkawlin, thosi pian theihna tui tling leh tui dahna khawlna chhin nei lote pawh; a chhin tha taka siam zel tur a ni.
* Thosilen zar leh thosi hlo (Repellants) hman that.
* Dengue theh darhtu thosite hian khaw en laia mi seh thin an nih avangin, Kawrban tluan hak leh thosi hlo in hnawihte a tangkai em em a ni.

Mission Vengthlang Local Council Area ah hian a hma a Dengue Case 9 hmuh chhuah bakah a hnu lama sample 22 lak atangin Dengue case 7 hmuh belh leh a ni a. Dengue Case Mission Vengthlang atanga a vei hmuh tawh zawng zawng hi 16 an ni.

Mission Vengthlang Local Council te hnenah hian Vector Borne Disease Control Programme te chuan Thosilen damdawia chiah sa (LLIN) leh Odomos te a mamawh tute hnena sem atan an hlan nghal bawk.