No.4201/2021-2022

Aizawl, the 8th March, 2022: Vawiin chawhma khan International Women's Day pualin India rama tribal hmeichhiate dinhmun chawikan kawnga thawhhlawk zual 'Women Achiever' mi 75 thlanchhuah zinga telpha Pi Laldinngheti, Champhai Bethel Veng hnenah chawimawina thuziak cheimawi hlan a ni. Chawimawina hi Sawrkar laipui Ministry of Tribal Affairs hnuaia Tribal Co-operative Marketing Development Federation of India (TRIFED) bultum a ni a, India ramin zalenna a neih kum 75 na cham lawmna hnuaia buatsaih niin, chawimawina thuziak hi Sawrkar aiawhin Pu C. Vanlalhruaia, Cooperative Audit Officer (CAO) Champhai chuan Pi Laldinngheti kutah a hlan a ni.

International Women's Day lawmna puala chawimawina hun Bethel Women Multipurpose Cooperative Society Ltd. Office-a buatsaihah Pu C.Vanlalhruaia chuan thu sawiin, India zalenna  kum 75 na cham lawmna kal zelah International Women's Day pualin mahni hmeichhe puite tana hnathawk tha leh an dinhmun chawikanna atana thawhhlawkte sawrkarin a chawimawi thu sawiin, India rampuma mi 75 thlanchhuah zinga Pi Laldinngheti a telpha chu thinlung taka a lawmpui thu a sawi a. Hmeichhiate dinhmun chawikan leh humhalh chu sawrkar laipui leh State sawrkar-in a ngaipawimawh em em a, scheme hrang hrang kaltlangin hamthatna leh chanvo te a siam thin a ni, a ti a. An tana hamthatna siamte chu hmasawn leh intunnun nana hmang thiam tura ngaihven fo thin turin kalkhawmte a chah a ni.  

Pi Laldinngheti chuan mite tana malsawmna ni tura ke penchhuah chu a inchhirawm loh thu leh a hlawhchham ngai loh thu sawiin, mite tana rawngbawlna kalpui hian kan hlim zawk thin a ni, a ti a. Sawrkarin hmeichhiate dinhmun chawikan a tum thute, Society-te a ngaihpawimawh thu leh a vulh thu sawiin, thalai leh hmeichhiate chu Society hmelhriata rinawm taka thawkte tan eizawnna  tling a ni tih hriaa zawm turin a sawm a. Mizoram Sawrkar Cooperation Department leh Sawrkar laipui Ministry of Tribal Affairs-in hmeichhiate dinhmun chawikan kawnga a hmalaknate hriatpuia chawimawina an pe chu phulo in tiin,  thinlung taka a lawm thu a sawi bawk.

Chawimawina a dawn theih nana a hnathawh leh hmalakna hrang hrangte tarlan a nih dan chuan Pi Laldinngheti hian Pradhan Mantri Van Dhan Yojana (PMVDY) hnuaia Self Help Group 30 siamna kawngah tha a thawh hlawk hle a. Heng zinga Self Help Group 15, member 300 awmna Bethel Van Dhan Vikas Kendra (VDVKC) hi ama kaihhruaina hnuaia kalpui mek niin, a hmalakna kaltlanga din SHG 15 dangte hi Zion Veng Van Dhan Vikas Kendra hnuaia awm an ni. PMVDY hnuaiah tun thlengin hmunphiah tel 6,541 an lakhawm tling tawh a, SHG ten inhlawh nan an zuarchhuak dawn a ni. SHG member-te zingah Pradhan Mantri Van Dhan Yojana awmzia leh kalphungte hrilhhriat kawngah theihtawp a chhuah thin bawk. 

Champhai District-ah kum 2012 khan Central Social Welfare Board kaltlangin Welfare programme 'Integrated Scheme for Women Empowerment (ISWE)' tih chu Khuangleng, Khuangthing, Khawbung -1 leh Khawbung -2 ah te a dinpui a. A hlawhtlin theih nan member 20 zel awmna SHG 4, hmeichhia vek awmna a din a. Heng SHG te hian Ar vulh, Vawk vulh leh Hmarcha sawngbawl hnate an thawk thin a, beneficiary 80 an awm tlinga chhinchhiah a ni. A kaihhruaina kaltlanga ISWE kalpui chu North East Region a pilot project model leh hlawhtling berah funding agency Social Welfare Advisory Board-in a thlang nghe nghe a ni.

Pi Laldinngheti hian kum 2010-2014, 2016-2018 chhung khan Sub-Hqrs. MHIP, Champhai President nihna chelhin hmeichhiate dinhmun chawikan kawngah theihtawp a  chhuah thin a. Kum 2017 atanga vawiin thleng hian Champhai Bethel Women Multipurpose Cooperative Society Ltd.ah Chairman hna a chelh a. A tul angin mamawhtu hnenah loan tenau te pawh an pe chhuak thin a, Nirmal LPG Gas connection 300 Society kaltlanga pek chhuah a ni bawk. NABARD pawhin Cooperative society kaltlanga mihnuaihnung zawk BPL chhungkua, hmeichhia, SHG leh tribal community chawikan kawnga  hmalaknate hi fakawm tiin lawmpui nan NABARD Infrastructure Development Asset an lo pe tawh bawk a ni.