Election Commission of India thupek anga Special Summary Revision, 2016 Tripura Bru Transit Camp-a Bru awmte kalchilh tura official, election party te chu ruahmanna fel tak hnuaia an duty na hmun an chhuahsan dawnah tukin zing khan NGO hrang hrang leh Political party Coordination Committee tangrual ten kal thei lovin an dang bet.

Mamit D.C. Pi Lalbiaksangi; Pu C. Lalnunmawia, S.P., Mamit leh mi pawimawh dangten Election Commission of India thupek kaltlangpui tur hian theih tawp chhuahin pungkhawma duty official lo dangtute chu kawng kian turin an ngen a. Hun engemaw chen an in nawr hnuah pawh official te hi an tlang thei ta lova. Hemi hnu hian Kawrthah lama kal tumin Election Party te hi an chhuak leh a, a hma ang bawka nasa taka dan anih avangin an tlang thei ta chuang lo a ni.

Summary Hearing thawk tura Election Party te hi Mamit, Lunglei leh Kolasib District atanga official te an ni a. Ruahmanna tha tak nena inpuahchah ni mahse NGO leh Political Party te hi an tam tham em avangin an kaltlang thei ta lo a ni. Hetih lai hian all NGOs leh Political Party Coordination Committee, Mamit hruaitute chuan an duhthu ngeia Mizoram chhuahsantu Tripura Transit Camp-a Bru (Reang) awmte vawitam tak kohkir an ni chunga Mizorama kir duh lo te chu anmahni kal chilha Special Summary Revision, 2016 neih an remtih theih loh thu leh a tawp thlenga an dodal tur thu an sawi a ni.

Election Official te kal thei lova mipuiin an dan hnu hian All NGOs and Political Party Coordination Committee, Mamit, Central YMA OB, MZP leh MSU hruaitu Aizawl aiawh mi 100 vel te chu achhun a zana Election Official te dang tur hian DC Office Gate bulah an duty zui nghal bawk.