District Civil Supply Officer, Lunglei District, Lunglei chuan vawiin khan Food Security Act chungchangah a hnuaia mi ang hian mipuite hriattirna a chhuah a ni :

Food Security Act hnuaia beneficiary (AAY leh Priority Household) tur te, Non-FSA hnuaia awm tur leh hming put tur veng tina Selection Committee-in thlan tur tih chu veng thenkhatin an la rawn thehlut lova. List hi a rang thei ang bera thehlut turin kan inhriattir a. Centre official te pawhin an hnuaia veng/khua ten selection fel, dik leh kim taka an neih a, a rang thei ang bera DCSO office-a thehluh a nih theih nan an khuate an vilin an enpui vek tur a ni.

List thehluhte hi kim tak leh dik tak an ni tur a ni a. Form A (AAY), Form B (PHH) te hi thlan tura bituk sa aia tam thlan theih a ni lova, Form C (Non-FSA) leh Form D (deletion) pawh kim tak leh dik taka thehluh tur a ni. Householder thlalak pawh thehluh vek tur a ni.

Tuna list thehluh tawh atanga a lan danin hming paih tur list hi a kim tawk lo tih hmuh a ni a. Hei hi Centre Official/Selection Committee ten data thunluh a nih rual hian a rang thei ang berin an tidik tur a ni. Form A, B leh C-ah hian veng/khuaa mihring awmzat dik tak an awm kim tur a ni a. Chuvangin Form A, B leh C (AAY/PHH/Non-FSA)-a awm lo hi chu Form C (deletion) hmanga thehluh a nih loh pawhin mihring awm lo anga ngaih an ni ang a. Form A, B leh C-a lang lote hming hi paih an nih pawhin engmah sawibuai theih a ni lovang.

Theihtawpchhuaha FSA kalpui tura hmalak a nih lai hian mipui leh khawtlang hruaitute tawiawna kan ngen a ni.