Vawiin khan Kolasib New Diakkawn Community Hall-ah Kolasib DC Pi Niharika Rai, IAS, District President, Bharat Scouts & Guides chuan tun kar chhung awh tur Tritya Sopan Camp, Scouts leh Guides te tana buatsaih a hawng.

Hawnna thu sawiin Pi Niharika Rai chuan, Scouts and guides movement in a thiltum ropui tak chu naupang ten nasa taka an chhawr ngei a rin thu a sawi a. Mahni inthununna te,midangte tana kawng hrang hranga malsawmna leh puitu tha ni tura zirtirna an dawnte chuan Khua leh tui tha, ram tana mi tangkai an la nih theihna tur anmahniah a tuh dawn a ni, a ti a. Tun tuma Tritya Sopan Camp buatsaih chu chhawr tangkai hle turin naupangte chu a chah a ni. Pi Rai chuan, an training chhunga phur taka an thil hriatte zira anmahni thatna tur bakah nakin hun thleng pawha anmahni nun pumpui vawngtu leh chawmtu tha an chhar chhuah theih na a nih ngei theih nana tan la turin a chah a ni.

Pu Lalrambuatsaiha, District Commissioner (S) & SDEO chuan Training Camp hawnna hi a kaihruai a. Training hi District Sports & Youth Services Department buatsaih a ni. Pu Lalngilneia, Organiser, Scouts & Guides, Course Trainer  chuan training chhunga hun hman dan tur leh S & Guides movement chungchang a sawi a. Kolasib ah tun tumhi hetiang ang training vawi li neihna tur a niin tun tumah hian school hrang hrang atangin naupang 179 te training pek anni dawn a. Tun kar Zirtawpni thleng a awh ang.

Tritya Sopan Camp chhung hian topic hrang hrang First Aid, Handicrafts, Knotting & lashing, Mapping, Estimation, Signalling, Woodcraft sign, Cooking without utensils, Cultural items, Singing/dancing, leh Drama/Skit te zirtir an ni dawn a ni. Pu Lalngilneia, Course trainer bakah Aizawl atanga he hun hmang tura kal Pu Vanlalthlana, Asst. Organiser bakah Kolasib atanga trainers ten zirtirna an pe thin dawn a ni.