35/2025-2026

Khawzawl, dated 3rd April 2025: Nimin khan Khawzawl DEO, SDEO, DPO & Tualpui VC tangkawp bultumin Tualpui khuaah Education Campaign buatsaih a ni.

Tualpui Centenary Hall a Education Campaign buatsaih hi Pu Kawlliana Kawlni, SDEO Khawzawl in a kaihruai a. He hunah hian Education Office Khawzawl atangin DEO/DPC Pu JR. Lalhruaitluanga leh Pu K Thantluanga, Dy. DPC, Samagra ten thu sawiin Tualpui khua hi Mizoram Chief Minister Pu Lalduhoma khua a ni a, Direct IPS ngei a ni tih an sawi a, thalaite leh zirlai kalkhawmte pawh zirna lamah kan Chief Minister zahawm tak ang hian a sang ber an thleng thei tih hre reng turin an chah a. Zirna lamah hma a sawn theihna turah hian Department, nu leh pa, zirtirtu, khawtlang leh zirlaite an pawimawh hle a ni tih an sawi bawk.

He hunah hian Tualpui VCP C. Lalromawia leh Tualpui YMA President Pu H. Ropara ten thu an sawi bawk a, Tualpui khuaah Education Campaign buatsaih a nih vangin lawmawm an tih thu leh hei hian rah tha tak a chhuah an beisei thu an sawi a, zirna lama an khawtlangin hma an sawn theihnan Tualpui VC leh YMA chuan an theihna zawnah hma an la zel dawn tih an sawi a ni.

Nimin Education Campaign-ah hian Education Department hotuten thupui thlan chhuah hmangte in fuihna thu an sawi a, he hunah hian zaithiam J. Lalrosanga leh Lalrundiki Renthlei (Diki Renthlei) bakah tualchhung zaithiam te an zai a. Tualpui khawtlang mipuite an tel tha hle a ni.