34/2025-2026

Khawzawl, dated 3rd April 2025: Vawiin chawhma dar 11:30 khan KVK Khawzawl te chuan Mission Oilseed Village atana an thlan Biate khuaa Hmunte zau Pu R.Lalrualliana huanah Field school an hmang a, vawiina field school hmangtu te hi kuthnathawktu mi 25 an ni.

He hun hi Dr. Malsawmkimi Senior Scientist & Head chuan kaihruaiin Pu Rambuatsaiha, SMS (Agronomy) KVK Khawzawl chuan Nihawi (sunflower) a chin leh enkawl dan bakah Nihawichi atanga hriak lakchhuah dan zirtirna a pe bawk. Biate a Nihawi chingtute hnenah hian Nihawichi variety KSBH 44 UAS hi chhungkaw 5 hnenah pekchhuah niin, a chinna hmun atan hian Tin 4 hmun hman a ni.

KVK Khawzawl te hian Hriaka intodelha hmasawnna hmuh anih theih nan Mission Oilseed village atan Biate leh Rabung khua te enchhin nan an thlang a, tunah hian a par vanglai niin May thla tirah hian seng theih tura beisei a ni.

Nihawi variety te KVK lam chuan an enchhin a, oil pai tam chi an ni a, hengte hi farmers ten tha an ti hle a, Biateah hian farmers tam zawkin season lehah phei chuan zau zawkin hmalak an tum thu an sawi a ni.

Farmer ten nihawi an tharah hian fertilisers engmah hman a ni lo a, buh la ching hman vek tura ngaih a ni. Tuna nihawi par hi December thla vela an chin a ni a, double cropping tih atan leh oil intodelh nan a pawimawh em em dawn a ni.