33/2025-2026

Champhai, 3rd April 2025: Vawiin khan District Fisheries Development Office, Champhai chuan I&PR Auditorium, CHANEM-ah Pradhan Mantri Matsya Sampada Yojana (PMMSY 2023-2024) hnuaia dil thar (New Pond) siamna atan mi 77 hnenah cheng 90,720 ṭheuh pe chhuakin a vaiin cheng 69,85,440 an sem chhuak a. He hunah hian Financial Literacy Campaign neih nghal a ni bawk. 

District Fisheries Development Officer, Pi Lalremsangpuii chuan he hun hi kaihruaiin,  ṭanpuina dawngtute chu an sum hmuh anihna ang taka hmang turin a chah a. DFDO hian National Fisheries Development Board hnuaiah India rama sangha khawitute hnathawh dan mumal taka chhinchhiah tum anih dan te a sawi a. Pi Lalremsangpuii chuan luidung nungcha humhalh a tul zia leh he mi kawngah hian mi zawng zawngin mawhphurhna  pawimawh tak kan nei a ni tiin sangha khawitu kalkhawmte chu thawhpuiah a sawm a ni.

He hunah hian sangha dil khuah dan chungchang leh a enkawl zui zel dan tur zirtirna pek a ni bawk. 

Chawhnu lam hunah hian Financial Literacy Campaign neih nghal a ni a. Pu Lawmkima, Lead District Manager, Champhai & Khawzawl in KCC Loan chungchang te, Bank loan lak dan te,  CIBIL Score pawimawhna leh Guarantor a ṭan fimkhur a ṭul zia te a sawifiah a ni.