445/2022-2023
Khawzawl, the 10th May, 2022: Khawzawl District Bawrhsap Pu C.C. Lalchhuangkima chuan MLA Fund atanga lei tuilakna pipe roll 250 leh tuikhuah siamna tur silpaulin 250 chu Tualte khuaa Tomato chingtu chhungkua 230 te hnenah vawiin khan a sem chhuak.

Tui pipe leh silpaulin semna inkhawm Vanhnuailiana Hall, Tualte-a hmanah hian Khawzawl DC chuan tomato chingtute mamawh tak tui pipe leh silpaulin-te bialtu MLA, Deputy CM ni bawk hmalaknaa sem theih a ni chu lawmawm a tih thu a sawi a. Mualkhang zau atanga tomato phurhna tur kawng chu Project Director, DRDA leh BDO te nen siam dan tur an ngaihtuahho dawn thu a sawi a. Tualte khaw mipuite taimakna leh Society mumal taka an kalpui chu lawmawm a tih thu sawiin, nakin thlenga tomato ching turin society tha leh nung tak a awm a ngaih thu a sawi bawk. Mipuite chu sawrkar atanga an thil dawnte tangkai taka hmang turin a fuih bawk a ni.

He hunah hian Addl. DC Pu Lalvenhima, PD, DRDA, Khawzawl ni bawk chuan bialtu MLA hmalakna leh khaw mipuite taimakna chu lawmawm a tih thu a sawi a. Mizoramah khaw thenkhatte chu taima tura infuih an ngaih laiin, Tualte khua erawh chu an taimak avangin khawdangte tan pawh entawn tlak an nih thu a sawi bawk a ni.

He hunah hian Pu R.Lalchhanchhuaha, Chairman, Tomato Growers Society leh Pu C. Kera te hnen atangin thusawi ngaihtlak a ni bawk.

Tun dinhmunah Tualte khuaah hian chenna in 240 vel awmin chhungkaw 230 in tomato an ching mek a. Dy CM leh bialtu MLA ni bawk, Pu Tawnluia chuan MLA Fund atangin Rs. 7,50,000 (cheng nuai sarih leh singnga) man Tomato Processing Plant a lo pe tawh a, he khawl hi hman theih tura buaipui mek a ni.

Tualte khuaa Tomato chingtute hian hmalakna chak zawk an neih theih nan December, 2021 atangin Tomato Grower Cooperative Society an din a. An pawl din hnua tomato thar chhuah hmasak ber 407 truck trip khat chu Khawzawl DC Pu C.C. Lalchhuangkima chuan vawiin khan a vailiam nghal bawk a ni.