446/2022-2023
Aizawl, the 10th May 2022: Vawiin chawhma khan Mizoram Legislative Assembly in kum 50 a tlin champha phak denchhenin Special Session of the 8th Mizoram Legislative Assembly neih a ni. Governor Hari Babu Kambhampati chuan Golden Jubilee puala thuchah a sawi hmasa a. Hemi zawh chiah hian Speaker Pu Lalrinliana Sailo chuan Chief Minister Pu Zoramthanga , Leader of the House ni bawk chu thu sawi tura sawmin Special Session hi tan a ni.

Special Session of the 8th Mizoram Legislative Assembly-ah hian House a thusawi tura a bik taka sawm a nih angin Pu Biswajit Daimary, Speaker of Assam Legislative Assembly chuan lawmpuina leh fuihna thu a sawi a. Speaker Pu Lalrinliana Sailo in lawmpuina thuchah Lok Sabha Speaker Pu Om Birla in a rawn thawn chu a chhiar leh a Link : dipr.mizoram.gov.in/post/message-of-shri-om-birla-honble-speaker-of-lok-sabha-on-the-occasion-of-the-golden-jubilee-of-the-mizoram-legislative-assembly

Hemi hnu hian Political party tin te aiawha thusawi tura ruat ten thu an sawi a ni. Mizo National Front Party aiawhin Deputy Chief Minister Pu Tawnluia’n thu a sawi hmasa ber a. Zoram People’s Movement Part aiawhin Pu Lalduhoma, MLA, Indian National Congress Party aiawhin Pu Nihar Kanti Chakma leh Bharatiya Janata Party aiawhin Dr BD Chakma ten thu an sawi a. Hemi hnua hian Speaker Pu Lalrinliana Sailo chuan tiamchin awm lovin session chu a khar zui a ni.

Governor Hari Babu Kambhampati chuan Mizoram Legislative Assembly kum 50-na lawman hun ropui takah a bik taka session buatsaihah thu a sawi thei chu vannei a in ti hle a. Andhra Pradesh state-ah MLA leh MP angin mipui rawng a lo bawl tawh thin thu leh MLA leh MP hlui a nih tawh avanga he hun hlut zia a hriatthiam thu leh mawhphurhna pawimawh tak a chang thei chu ropui a tih thu a sawi a ni.

May 10, 1972 khan Mizoram UT sawrkara MLA 33 awmna Assembly thutkhawm hmasa ber chu neih a nih thu a sawi a. Hemi ni atangin hian Mizoram Legislative Assembly chuan hmalam pan zelin nasa takin hma a sawn tawh a. Kum 1987 a state kan nih atangin MLA 40 kan nei leh a.Tunah chuan hma kan sawn tawhin Mizoram Assembly chhunga thutkhawm neih leh an rorelna kalpui dan te pawh a felfai thin em avangin state dang te mai ni lovin Parliament tan hial pawh entawn tlaka mawi a ni a ti. Kum 1986 a remna thuthlung ziah fel leh tun thlenga remna leh muanna nghet tak a awm chhunzawm ta te hi Mizoram mipuiin remna leh muanna an duh zia tarlanna tha tak a ni a. Hei vang hian kan inthlanpui neih tawh reng reng te kha a thianghlimin sawisel kai a la awm miah lo a ni a ti bawk.

Vawiin niah chuan Mizoram chu state ralmuang ber kan ni tawh a. He hlawhtlinnah hian mipui leh mipui kaihruaitute – NGO te leh Kohhran hruaitute fak an phu em em a ni tih a sawi a. Mizoram chhungah Hnam hrang hrang leh sakhaw hrang hrang betute chu inngeihtlang takin kana wm mek a ni a ti. Mizoram hmabak a eng a – Bangladesh leh Myanmar ten en ramri kan in tawm avangin Asia chhim leh Asia chhimchhak ram te leh India inkalpawhna kan ni chho mek a; KMMTTP leh Rel Kawng te a puitlin hunah phei chuan kan thawhsenloh thawhtur a awm dawn tih a sawi a. Tuna kan mamawh chu Kawlpetha hnianghnar tak siam theihna kan neih anga siam te, khualzinmite hipna tha tak tak kan neihte hmanga sum haihluh dan ngaihtuah te leh Health sector bika tan lak zual te a ni ti.

Full Speech of Governor Link : dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-mizoram-legislative-assembly-golden-jubilee-on-10th-may-2022-at-mizoram-legislative-assembly-aizawl

Special Session hawngtu Chief Minister Pu Zoramthanga, House Leader ni bawk chuan India ram zalenna in kum 75-na hmel a hmuh kumah Mizoram Legislative Assembly kum 50-na tlin kan lawm thei chu a lawmawm tak zet tih a sawi a. State dangte Assembly aiin la naupang zawk deuh mahse House chhunga rorelna kalpui a nih thin danah na na chuan state upa zawk te entawn a ni mek a. He dinhmun kan thlen theih na chhan hi Pathian kaihhruaina a vang a ni a ti. State naupang kan nih angin kawng tam takah state dang te kan pha lo chungin state dang te chuan keimahni atangin remna leh muanna chungchangah zirtur erawh an nei thung a. Kan chhehvel ram te leh kan state thenawmte kan en chuan hei hi a chiang hle a. Mihring nuai tlemte chenna state hi India ram mihring tluk-leh-dingawn aia tam mipui te hnenah hian “ remna leh muanna” zirtir turin Pathianin min ruat a ni a ti.

Speaker sawmna angin Pu Biswajit Daimary pawhin thu a sawi a. Mizoram mipui ten en undivided Assam-ah an awm ho thin thu te, Mizoram atangin MLA hmasa ber 3 te pawh an chhuanawm thin hle nia an hriat thu te a sawi a. Mizoram a indan hnuah Mizoram Legislative Assembly in kum 50 hmel a hmu chu Assam Chief Minister leh mipuite pawhin an lawmpui hle tih a sawi a ni. Pu Daimary chuan Mizo te chu remna leh muanna duhmi an nih rualin zalenna ngaina leh hnam huaisen an ni a; India ram British in a awp lai pawh a British laka zalenna sual tawh in ni a. He hunah hian Lalnu Ropuiliani lo huaisen zia kha ka dawi lang duh a ni a ti.

Mizoram Legislative Assembly-ah session entawn tlak takin kalpui a ni thin chu lawmawm a tih thu a sawi a. Mizoram Legislative Assembly hmasawnna chuan rah tha a chhuah nia sawiin hun reilote Mizoram chu state hmasawn ber pawl nia a hriat thu a sawi bawk a ni. Mizoram Legislative Assembly hun pawimawh bikah duhsak taka Assam Chief Minister nen sawm a nih avanga a lawmthu a sawi a. Ramri chungchangah pawh Mizoram Chief Minister leh Assam Chief Minister te an in be pawp reng a, hun reiloteah inremna tha tak a awm theih a beiseiawm tawh hle a ni a ti bawk.

Vawiina Assembly Special Session-ah hian Speaker hlui te, MLA hlui te, Chanchinbumite leh Sawrkar hnathawk zinga Head of Department chin leh a chunglam te sawm an ni a. He hunah hian tuna Home Minister Lalchamliana, Speaker lo ni tawh nena tiamin Speaker hlui pali 4 House-ah thuttir an ni a. Speaker Hmasaber Dr H.Thansanga, Dr Kenneth Chawngliana leh Pu R.Romawia te chu Speaker Pu Lalrinliana Sailo veilam, MLA te thutna sirah thuttir an ni a. Ex-MLA te pawhin Speaker veilam hung pawnah thutna an rem bawk a. Ex-MLA zingah hian State MLA batch hmasaber atangin Pu K. Sangchhum leh Pu Sapliancheuva te pawh an tel a ni.

Special Session neih zawhah hian Session Hall-ah a huhova thlalakna neih a ni a. Hemi hnu hian Governor Hari Babu Kambhampati chuan Golden Jubilee hriatrengna lung phum hawngin Golden Jubilee Exhibitions a fangkual leh a. Jubilee lung hawnna neih zawh hian Jubilee Darvuak neih leh a ni. Nizan lamah khan Conference Hall, Assembly Annexe-ah Governor Hari Babu Kambhampati te nupa pualin Cultural Programme buatsaih a ni a. Chief Minister Pu Zoramthanga leh Council of Ministers, Assam Speaker Pu Biswajit Daimary te, MP te, MLA te, Ex-MLA te, High Official sawmbik, NGO hruaitute an tel a ni.