1854/2022-2023
Khawzawl, the 8th September, 2022: Khawzawl District Tualte khuaa Tomato Festival neih dan tur chungchang chu District Bawrhsap Pu C.C. Lalchhuangkima hovin vawiin chawhma dar 11 khan DC Conference Hall-ah rel a ni.

Thukhawm chuan October ni 25, 2022 hian Horticulture Department, DC Office leh Tualte Tomato Grower Society-te tangkawp hmalaknain Tualteah Tomato Festival buatsaih tha a ti a. He hun hmanpui tur hian Deputy CM Pu Tawnluia, Tuichang bialtu MLA chu sawm nise tih a ni a, mawhphurhna leh chanvote insem niin, hlawhtling taka buatsaih a nih theih nan mawhphurhna neite chu theihtawp chhuah tura chah an ni.

Tualte tharchhuah tomato chawilarna leh kuthnathawktute thawhrimna hriatpuia chawimawina hun Tomato Festival hmanna hunah hian tomato leh tomato sauce zawrh chhuah a, hemi hnu hian Mizoram hmun dangahte zau zawka hralh chhuah leh tura ruahmanna siam nise tih a ni bawk.

He hunah hian SP Pu Lalchhuanthanga, PD DRDA Pu Lalvenhima, DHO Pu Lalnunpuia, DAO Pu B. Ramnunsanga, KVK Senior Scientist & Head Dr. Henry Saplalrinliana, Tualte khawtlang hruaitu leh tomato chingtute bakah mi pawimawh dangte an tel a ni.

Attachment

  • Loading attachment...