Public Health Engineering Department hian thangkhat lian aia rei mah tui kan sem tawh a. Lui atanga tui pump chhuaha sem chu kan thiam tawh khawp mai a. Tui sem mai piah lamah tui herh haw-na tap atanga in nghal pawp ngam khawpa thianghlim tui sem thei turin ka challenge che u a ni, tiin PHE Minister Pu Zodintluanga chuan PHE Engineer-te hmaah a sawi.

He thu hi Pu Zodintluanga chuan vawiin March ni 16, 2016-a National Drinking Water and Sanitation Awareness Week hawnna programme neihna PHE Conference Room-ah a sawi a ni.

Khuallian Pu Zodintluanga chuan tui hi boruak tih lohvah chuan mihringte’n kan mamawh ber, a thlakna awm lo a nih avangin ren taka hman a pawimawh a ni, a ti a. Tui chu mihring hriselna nena inzawm tlat, thil nung tinrengin dam khawchhuah nana an mamawh a ni a, humhalh leh venhim a tulzia mipuiin an hriat nan Awareness Week pawh buatsaih a ni tiin, hrisel nan faina leh thianghlimna chu tui tluk bawka pawimawh a ni tih hriat tel a tul thu a sawi bawk. PHE Department tui sem chu chhuan so thianghlim leh kher ngai tawh lova in tlak a ni tih mipuiin an rin ngam theih nana tan la turin PHE officer leh staff-te chu fuihin, Minister chuan ram mipui, a bik takin thingtlang mite’n hnianghnar taka tui thianghlim an dawn theih nan leh faina leh thianghlimna kawnga hma an sawn zel theih nan tih dan tha zawk zawng zel turin a chah.

Minister chuan, hriatna hian mi a tichak a, thawhhona tha a siam thin tiin, mipui tana rawngbawlna kawngah technology thar hmang tangkai thiam turin lehkha chhiar zau leh ram dang tih dan thate zir chian a pawimawh thu a sawi. Mizoram chu zun leh ek kan thehthang dan kawngah kan fel khat viau laiin hmun tlem teah ek-in mumal nei lo leh ram palailenga inthiar mai kan la awm avangin open defecation free state-ah kan inpuang thei lo va; ODA Free state ni tur hian tan kan la mek a ni. Heng kan hmabak tlem la awm avang hian Mizoram chu kan hmingthat tur angin kan la hmingtha tawk lo va, vawiin programme denchhen hian Department pawhin tan kan lak thar leh a ngai a ni, a ti.

Minister chuan India sawrkar-in faina chungchang a ngai pawimawh leh Swachh Bharat Mission te hial duang a, thingtlang leh khawpui mai bakah a hranpaa zirna sikul-ah te a kalpui leh zel chu lawmawm a tih thu a sawi bawk a ni. A sawi zelnaah Minister chuan, khawvel pumah lei hnuai tui hna chu a kangchat mek a, Mizoramah pawh chu chu a takin kan tawng mek a. Tui mamawhna sang zel karah kan tui hna te a lo tlem zel chuan harsatna lian tak kan la tawk dawn a ni, a ti. NASA Satellite Gravity Recovery and Climate Experiment (GRACE) an tih hmanga khawvel leilung leh a chhung enfiahnaah chuan ground water hi khawvel pum puiah a kam nasa em em a, India ramin tui in tlak kan hmuhna lian ber Indus Basin pawh khawvel pum huapa chhiarin tui tlem chakna ber pahnihna a ni hial thu a sawi a, Tuikual lui te, Chite lui te pawh tunhma chuan lui tih tham a ni thin a, mahse vawiinah chuan tui a tlem ta hle a ni. Tuirial lui te pawh hi a kum telin tui hi a tlem tial tial thu a sawi a ni.

Minister chuan Mizo chhungkuate hi mahni chhungkaw mamawh aia mahni it zawng thil leia inhmang ral kan tam thu a sawi a. Chhungkaw tam tak chuan fur ruahtui khawlna tur tuizem an mamawh em em lain mobile phone leh thil dang mamawh lem lohte leiin an sum neihte an khawhral a, furtui ngah state Mizoramah hian mi tam tak chuan furah tui kan nghei kan nghei mai a ni a ti. Chhung tinten kan tlin tawk ang theuhin mahni chhungkaw mamawh an set fel a tul thu a sawi.

Vawiina Awareness Campaign Week hawnna programme-a Khual Zahawm PHE Secretary Dr. C. Vanlalramsanga pawhin thu sawiin, tui chu thil siam zawng zawng tan nunna hnar a nih thu leh chumi enkawltu chu PHE Department niin rawngbawl hna pawimawh tak an thawk a ni a ti a, PHE-in hna a thawh that chuan Mizoram mipui tan malsawmna a nih thu a sawi a ni.

He Awareness Week hawnna hun hi PHE Engineer-in-Chief Er Valbuanga’n kaihruaiin, inlawmna thu leh Week chungchanga hriat tur tulte a sawi a. Zone-II Chief Engineer Er C.Lalremsiama’n “Tui leh Invawn Thianghlim Beihpui – 2016 Thutiam” sawi rualna hun kaihruaiin, Zone-I Chief Engineer Er Lalmuanzova’n hun kharna thu a sawi. He hunah hian PHE Communication & Capacity Development Unit (CCDU)-in Competition a buatsaiha lawmmante sem a ni bawk. Awareness Week hian March ni 16 atanga March ni 22, 2016 thleng a awh ang.