India Hmarchhak State-ah te Ruihhlo ngai inchiu thin - PWID (People Who Inject Drugs) enkawl leh titlem tura hmalakna Project Sunrise chu Mizoramah Champhai leh Aizawla kalpui tura duan a nih hnu in nimin (16.3.2016) khan he hmalakna kalpuitu tur hrang hrangte tan a project chungchang inhrilhhriatna hun Champhai CMO hovin I&PR Conference Hall, CHANEM ah neih a ni.

Chief Medical Officer Dr. C. Zirliana chuan AIDS vei leh HIV hrik pai zat tam kawngah Champhai dinhmun a that loh thu leh, Health Department-on hmalakna a lo neih tawh te thuam tha a belhchhah leh pui tura Project Sunrise kalpui a ni chu mipui mamawh chhanna nia a rin thu leh, HIV/AIDS do kawngah tlawmngai pawl leh kohhran te tawiawmna a pawimawh thu a sawi a ni.

Pu Robert Lalrempuia Khiangte, State Coordinator, Sunrise, FHI 360 chuan Project Sunrise thiltum leh hnathawh dan tur tlangpui sawifiahna neiin, Dr. Zonunmawii, District Project Manager, DAPCU chuan HIV/AIDS-a Champhai dinhmun a tarlang bawk a. Chawhnu lamah PWID TI (Target Intervention) te nen sawihona hun hman a ni bawk.

Mizoram hi India state zingah HIV/AIDS vei tam ber pahnihna niin, Mizoram District zingah Aizawl leh Champhai hi a tam filawr na Category A-a dah a ni a. Tuna Project Sunrise hi district pahnih a kalpui a nih hian Mizoram pum a ruihhlo ngai inchiu thin 65% chu a huam nghal dawn a ni.

Champhai District-a thisen test-na hmun ICTC record-a alan dan in kum 2002-2015 thleng khan mi 40,919 thisen endik ah mi 1,369 positive (3.3%) hmuhchhuah niin, heng bakah Nau pai mi 21,703 endik ah 179 positive (0.5%) an awm bawk a. HIV hrik pai zingah hian kum 25-34 inkar an tam ber a (46%), inkaichhawn danah hian mipat-hmeichhiat avangin 55% , inchuina hriau inhmantawm atangin mi 40%, nu in a fa hnena a kai chu 5% a ni a, heng bakah hian a chhan leh vang sawifiahloh 1% a awm bawk.

Project Sunrise hnuaiah hian tunah chuan thawktu tur hranpa lak vak a awm lova. Hemi kawnga hmala mek tu hrang hrang NACO, SACS, NGO, PWID TI leh midang dangte nena thawhhona tha siam chunga kalpui dan tur ruahman a ni a. Training pek te leh intervention programme kalpui te a tel a. He hmalakna ah hian sorkar department pakhat emaw pawl pakhat hanthawh tur dah ngawt chuan a hlawhtlin theih dawnloh thu leh, theih ang tawpa tanrual a pawl hrang hrang inthlunzawm a ngaih thu sawi a ni a. Dan kengkawhtute nena thawhhona tha tak siama inpuih tawn an ngaih pawimawh thu nimin programme ah hian sawilan a ni bawk.

Nimin orientation programme ah hian Kohhran leh Tlawmngai pawl hrang hrang aiawh te bakah Media leh Excise Department lam atangin an kal a ni.