Vawiin khan Kolasib Addl DC Pu Laltanpuia Hnamte, MCS kaihhruaina hnuaiah kolasib district administration chuan Kolasib District huam chhunga harsatna tawhna hmun te chu a hmunah kalin an tlawh.

Tui lian avanga harsatna tawk te a bikin Bairabi leh Meidum khua te chu fang kualin (spot verification) harsatna an tawh hrang hrangte an zirchiang a, tui lian avanga harsatna hrang hrang thleng thei heng ei leh in, tui tlan tur thianghlim, leh natna chi hrang hrang leng thei laka inven dan tur te an ngaituah a. Tun Dinhmunah District Administration chuan Dal, Alu, thingpui fe, chini etc bakah khaw mipui ten tui thianghlim an tlan theihnan PHE Department te nen thawk hoin Chlorine tablet hmanga tui tih thianghlim dan tur chungchangah hma an la nghal a hemi bakah hian natna chi hrang hrang a len thula inven leh in enkawl nan Kolasib atangin helai hmun hi kal chilh in Doctor leh Nurse bakah damdawi chi hrang hrang thahnem tak nen an inring reng bawk ani. Kolasib Addl DC hnen atanga thu dan danin tuilian avanga huan lo ram thlai hmun chan ta te chu tui a kam deuh hun ah a kaihhnawih Department heng Agriculture, Fisheries, Horticulture etc ten an zirchiang anga chu report chu DC Office a an thehluh tur thu hriat a ni, District Administration hian State Sawrkar ah report an thehlut leh dawn a ni. Pu Laltanpuia Hnamte chuan tun tum khuarel chhiatna a thlen  chungchanga Sawrkar Department hrang hrang leh Khawtlang hruaitute a bikin Sub Hqrs YMA Kolasib,  Jt leh Branch YMA Bairabi bakah VC te inpekna chu fakawm a tih thu a sawi a, hei hi a bul tanna chauh niin thawh tur a la awm dawn chauh a, a tawp thlenga thawhho puiah a sawm nghal a, khawtlang ina harsatna a tawh chungchangah hian tumah a bo a bang awm lovin tanrual a ngai a ni tiin Sawrkar anga hmalakna tur a awmna apiangah District Administration chu a in ring reng a,  theihtawp a chhuahzel dawn bawk a, khawtlang hruaitute leh mipuite chu inthlahrung hauh lova an harsatna tawh te chu Distrcit Administration a thlen turin a chah bawk a ni.

He hunah hian kolasib a/c Bialtu mla pu pc zoram sangliana  chu harsatna tawhna hmunah hian awm ve in tun hnaia ruahsur nasa avanga tuilian in a tihbuai a bial chhunga khaw pathum meidum, pangbalkawn leh bairabi te chu a tlawh kual a.

Bialtu MLA chuan tuilian avanga harsatna namen loa tawkte chu a tuarpui thu a sawi a, vanduaina tamtak chu mihring dan thei rual a niloh thu sawiin chutih laiin harsatna sutkian dan tur leh harsatna a tlem zawk nana lo inpuahchah chu enge maw chen a inrin lawk theih thu a sawi a. Tun tuma Khaw 3 ina harsatna an tawh chungchangah pawh theihtawp a chhuahpui tur thu sawiin Bial mipui te chu thlaphang lo turin a chah a ni.

Hetih lai hian Ruahsur nasa avanga harsatna thleng chungchangah Nizan dar 9 khan Bialtu MLA Pu PC Zoram Sangliana hoin kolasib District officer leh khawtlang hruaitute chu harsatna sutkian dan tur ngaituahin  an thukhawm nghal a. He thutkhawm ah hian chhungkaw hrang hrangin harsatna tawh dan sawiho ani a. DC Office lam hotute chuan nimin khan immediate relief atan Bairabi, meidum leh pangbalkawn khua ah silpauline 40 an pek thu an tarlang a. Hemi bakah hian harsatna tawk chhungkua te tan chen lailawk na tur hmun leh an ei in tur bakah medical facilities lamah hma an lak nghal tur thu an tarlang bawk.Sub hqrs YMA chuan a tul dana zirin zanin hian harsatna tawhna hmun pan nghal mai an inrin thu an tarlang bawk a. Hemi bawhzui nan hian Advance party atan sub hqrs yma hruaitu thenkhat chu nizan la la khan an kal nghal bawk ani. Tun dinhmunah tui lian avangin Bairabi a chhungkaw chenna in 100 vel chu chhuahsan tawh nia thudawn niin Bairabi khaw luh dawna Lei chu motor a kan theih ani loa lawnglenga kai ngaiin, Zophai hmun pawh tui in a chim a, lawngleng a inkal pawh a ngai a ni, hemi bakah hian meidum khua ah mihring chenna in enge maw zat chu tuilian hian a chim bawk a ni. Tuilian avanga harsatna tawkte chu hmun remchangah sawn chhuah an ni a, District Administration hmalakna hnuaiah Sub Hqrs, Joint leh Branch YMA te puihbawm na in an ei leh in tur buatsaih chungchangah pawh hmalakna a kal zel a, tun dinhmunah harsatna liantham tawk an la awm lo nia thudawn a ni.

Tuilian avanga harsatna thleng chu ruahmanna felfai zawka buaipui a nih theih nan District Level Meeting pawimawh te pawh sawn hlat rih a ni a Leimin leh tuilian avanga kawng hrang hranga buaipui ngai tur thil awm thei sukiang turin  Department hrang hrangte chu inring reng turin District Administration chuan a chah bawk ani.