kar kalta khan NEDP hnuaia Project pakhat MiMIR -mipui mamawh intawm ruahmanna chu Dr.Arun T, IAS Kolasib Bawrhsap chuan DC Conference Hall ah a tlangzarh.

 ‘My Project, My NEDP- Mipui Mamawh Intawm Ruahmanna (MiMIR)’  project hi District tinah hmasawnna ruhrel, mitinte chhawr theih tur siam a ni dawn a. Scheme hnuaiah hian cheng  Vaibelchhe 8 dah a ni a, District tinah cheng Vaibelchhe  1  hu project kalpui tura ruahman  niin, Project thlan kawngah dik leh felfai taka tih tum a ni. MiMIR hnuaia Project  siama inelna chu June-August, 2018 chhungin neih a ni anga, sanction fund chu September thla  chhunga pekchhuah hman tum a ni. Hemi tur hian Khawpui, Thingtlang leh Veng chhung atang tein Project siam theih a ni a, a tel duhte chuan July Ni 20, 2018 ral hma ngeiin Bawrhsap hnenah Project Concept Paper thehluh tur a ni.

Project Concept Paper chu Joint Committee kaltlanga thehluh tur a ni a. Joint Committee-ah hian Local Council/Village Council leh  YMA, MUP leh MHIP atanga aiawh member te an awm dawn a ni. Hemi kaltlang lo hi chuan Project engmah pawm a ni lo ang. Joint Committee member tinte chu Project pawm leh pawm loh tur chin lo remruatpuitu an ni. Heng project hrang hrang theluh te hi MiMIR Committee chuan lo thlifim in a tha ber a thlang chhuak dawn ani.

Project chu District huam chhunga khawpui, thingtlang leh Veng chhunga hmasawnna ruhrel chhawrnahawm, inhmantawm theih leh tangkaipui tham  cheng  vaibelchhe 1 aia tamlo a ni tur a ni a. Project te nawi siam nual lovin Project lian tham pakhat mipui vangtlang intawm theih, hmasawnna thlen thei  tha tawk tak a ni tur a ni a.  Project chhawrtlak hnathar siamthei leh thil thar hlak angte chu MiMIR hnuaiah hian ngaihpawimawh hmasak a ni ang. Project siamna atana ram mamawh ang chiah MiMIR fund emaw, sawrkar emawin ram leina a tum dawn lo a ni. Hemi chungchang hrechiang duh tan Deputy Commissioner hnenah zawhfiah theih a ni.