Tui tih thianghlim dan tur leh enkawl dan tur zirin Communication & Capacity Development Unit, Public Health Engineering Department (PHED) Mizoram buatsaihin vawiin khan “Grassroot Level Training On Water Quality Monitoring & Surveillance Programme” neih a ni a, Training hi Pu H.Lalengmawia, Deputy Commissioner chuan a hawng a ni.

Training hawnna inkhawmah hian Pu H.Lalengmawia chuan Kolasib District chu Mizoram hmel lanna pawimawh ber pakhat a ni tiin, Mizoram hmasawnna ruhrel pawimawh tak tak kan district chhungah hian a awm a. Hengte avang hian Kolasib District chu tui hna enkawl thianghlim leh humhalh chungchangah pawh district dangte entawn tlaka kan awm angai a ni a ti a. Tuihna a kang chak a, tui thianghlim hnianghnar taka pump tur PHE in a neih reng theih nan khawtlang mipui te kan tan a ngai a ni tiin, hemi kawngah hian khawtlang hruaitute tang tur leh mipuite zirtir uar turin a chah a. Kan khua theuh a tuikhur leh a hna pawh kan vawng fai tur a ni a ti a. Tui hri leng thin pawh thianghlim chuan pumpelh thei a ni tiin, thianghlimna kawngah pawh tan kan lak angai a ni a ti bawk.

Vawiin training-ah hian Kolasib District huamchhunga Village Water & Sanitation Committee (VWSC), Village Council te, YMA leh MHIP member te kohkhawm an ni a. Tui lak dan leh a vawn thianghlim dan te leh thianghlimna chungchang zirhona neih a ni a. Er. Liantluanga Chohte, Sr. SDO PHED Kolasib, Pu T. Pahlira, Sr. Chemist, State Referral Institute PHED Aizawl leh Pu R.Laltanpuia, Chemist District Laboratory PHED Kolasib ten zirtirna an pe a ni.