No.4381/2021-2022

Aizawl, 24th March, 2022: District Election Officer (DEO), Khawzawl District buatsaih, zau zawka Election chungchang inzirtirna programme, Systematic Voters Education and Electoral Participation (SVEEP) hnuaiah nimin khan SVEEP Poster tarchhuah tan a ni a. DEO Khawzawl enkawl Tuichang Assembly Constituency huamchhunga Booth Level Officer (BLO) ten an bial chhung theuha hmun lun leh langsar laiah Poster-te hi an tarchhuak a ni.

Poster-ah te hian SVEEP Slogan inphuahsiak buatsaih hnuhnung bera slogan tha bera thlan pahnih, 'Khua leh tui tha ni turin roll-ah i chuang dun ang' tih leh 'Midangte thlan sa sawiseltu mai ni lovin, i ram leh hnam hmasawn nan nangmah ngeiin dik takin vote thlak ve rawh le' tih te tarlan a ni.

Polling Station huamchhung hmun lun laia SVEEP Poster tarchhuah hian a tum ber chu mipui tam zawkin Electoral Roll-a inziahluh leh, Election kaihhnawiha tel ve tura sawmna thuziak an lo hmuh theih nan te, chumi lam hawia rilru an peka ke an pen theih nan te a duan a ni.

Tuichang Assembly Constituency huamchhungah hian Polling Station 28 awm in, kumin January ni 15 a Electoral Roll tlangzarh hnuhnung berin a tarlan dan chuan voter 17,250 an awm a ni.