No.4382/2021-2022

Aizawl, 24^th March, 2022 : Nimin khan Health Minister Dr. R. Lalthangliana chuan AIDS Healthcare Foundation (AHF) Chief of Global Advocacy & Policy Pi Terri Ford sawmna chhangin AHF AIDS Outreach Centre, Fort Worth, Texas, USA a tlawh a, he Centre-a AIDS veite tana hma an lakna chi hrang hrang -

(1)    AIDS veite tana awlsam zawka Pharmacy (damdawi zawrhna) an hawn te

(2)    AIDS veite tana Ha (Dental Clinics) changtlung tak an neih te

(3)    AIDS vei harsa tak  tak te tana a thlawn a ei leh in tur an pek thinna te

(4)    AIDS vei, rilru hah em em te tana councelling centre hawn a nih dan te

(5)    AIDS veite tana Health Insurance Ryan White leh ADAP (AIDS drugs Assistance Programme) an kalpui dan te

(6)    AIDS kher lo pawh STD (Sexually Tranmitted Diseases)leh a kaihhnawih dang vei te thleng pawh a an lo enkawl dan te, leh

(7)    LAB-CORB - AIDS leh thil dang chi hrang hrang an test na hmun pawimawh tak tak te a tlawh a ni.

Health Minister hian thusawina hun tha tak changin hetiang ang a AIDS veite enkawlna hmun leh hmanrua changtlung tak tak te hi Mizoram tan pawh hman ve theih dan awm se a duh thu a sawi a. Thil dang a hmalakna thar awm thei tur te pawh AHF hotute nen sawiho nghalin, Minister thusawi hi an ngai pawimawh hle a, a theih ang ang a Mizoram tana theihtawp chhuah an tum thu an lo hrilh.

He meeting ah hian AIDS Healthcare Foundation hotu pawimawh tak tak Pi Terri Ford, Chief of Global Advocacy & Policy leh Pu Salvador, Global Advocacy Administrative Coordinator, California an tel a. Anni bakah Tarrant County Commissioner Pu Roy Brooks, Tarrant County Public Health Department enkawltute, Pu Anthony Snipes, AHF Regional Director for Texas leh mi pawimawh tak tak thahnem tak an tel a ni.

Hemi hnu hian Health Minister hian Texas State Capital Dallas-a HAHF Healthcare Centre a tlawh a, he Centre hi USA-a AHF in AIDS Clinic an neih zinga lian ber niin, AIDS veite an buaipui dan leh chhawmdawlna an pek dan chi hrang hrangte an lo entir a, India ram Health Minister tumahin an hmunhma te an tlawh ngai loh thu sawiin, Mizoram Health Minister in hetianga an hmun pawimawhte a tlawh avangin lawmthu an lo hrilh a ni.

Heng bakah hian Health Minister hian Dallas Market Centre (Access and Information Network) hmunah mi pawimawh tak tak- Dallas Mayor aiawhte, City of Dallas Director aiawhte’ Dr. Phillip Huang, Medical Director, Dallas County Health and Human Services leh mi pawimawh tak tak dangte an tel a. Mizoram nena thawh ho dan tur te an sawiho a ni.

Dr. R. Lalthangliana’n HIV/AIDS lama a hmalakna chhuanawm leh entawntlak an tih avangin Mayor, City of Dallas hnen atangin Special Recognition Certificate a nih bakah, AIDS Healthcare Foundation ten Certificate of Appreciation an hlan bawk a , he Certificate ah hian Michael Weintein, President leh Terri Ford, Chief of Global Advocacy & Policy, AIDS healthcare Foundation, USA ten hming an ziak a ni.

Dallas County Judge Pu Clay Lewis Jenkins chuan HIV/AIDS dona kawnga Health Minister Dr. R. Lalthangliana hmalakna chhuanawm a tih zia lantirnan Proclamation Certificate a hlan bawk a ni.

Health Minister-in Dallas-a hmun hrang hrang a tlawhna leh meeting pawimawh tak tak a neihpui hian hun lo la kal zel turah Mizoram tan rah tha a chhuah ngei an beisei thu heng mi pawimawh tak tak te hian an sawi chhuak a ni. Health Minister hi Pi Lalmuanpuii, Treasurer, Central Mizo Society of America, Pi Ngurmawii Sailo leh Dr. Vanlalchhanhima Ralte ten an tawiawm a ni.