No.4383/2021-2022
Dated Aizawl, the 24th March, 2022: Vawiin khan Serchhip Press Club ah National TB Elimination Programme bul tumin World TB Day hman a ni a, TB natna laka invenna leh inenkawl dan inzirtirna hun buatsaih a ni.

He inkhawm hi Pu H. Laltanpuia, DPS in kaihruaiin Dr. ZD Lalmuanawma, DMS chu khuallian a ni. Khuallian chuan, kum dangah pawh he ni hi an hman thin thu leh TB natna chungchang inzirtir nana an hman thin thu sawiin he hun hmang tura kalkhawmte chungah lawmthu a sawi a. TB natnain min la chenchilh reng a, thihnate pawh min la thlen a, chuvang chuan he natna laka kan him theih nana kan hriatturte leh kan zawm turte kan inhrilhhriata, mipuiten kan ngaihvena, fimkhur taka kan nun pui a la tul em em a ni, a ti. TB natna chu enkawl dam theih natna anih avangin a veite hmuhchhuah rana tha taka damdawi hmanga enkawl thuai a pawimawh hle tih tarlangin, mipuiten inrinhlelhna an neih chuan rang taka inentir thuai thin turin a ngen a ni.

Dr. Lalnunhlima Khiangte, District TB Officer chuan kalkhawmte chu TB natna laka inven dante, mipuite inzirtirna tur chi hrang hrangte, TB natna veite enkawl dan turte chipchiar takin a zirtir a ni. Serchhip district ah 2021-22 chhungin case 80 hmuh an ni a, kumin bikah TB vanga boral an la awm lo a ni.

Hun hmasa hman zawhah kohhran hruaitu leh NGO hruaitute pualin Workshop neih chhunzawm leh a ni.

Serchhip World TB Day puala hun hmannaah hian Serchhip khawpui chhunga kohhran hrang hrang aiawhte, tlawmngaipawl hrang hrang aiawhte, chanchinbumite, infiammite an kal khawm a, kumina World TB Day thupui hi “TB natna tibo turin i tha leh zung seng la, nunna chhanhim rawh” (Invest to End TB. Save Lives) tih a ni.