Tunhnai ruah sur nasa avanga Keitum to Artahkawn Road a Tuichang Lei innghahna (foundation) tlahniam nia hriat leh sawi chu PWD Serchhip Division a Engineer ten kar hmasa khan a hmunah tlawhin an enfiah a, vawiinah siam ngai thenkhat siamin hna an thawk bawk a. Lei innghahna hi a tlak hniam loh thu leh lei kaina (approach) zawk a tlak hniam deuh thu sawiin, Lei hi a la him thu an sawi.

He Lei hi kum 1985 a siam niin Keitum lam atanga Lei va luh kaina approach slab hi concrete a chhung lovin, leivunga chhun khah (Earth filling) a ni thung a. A hun lai hian mumal taka tihmuk (compait) a ni lem lo bawk a ni. Hei hi khua reiah rawn lang chhuakin, tunhnai ruah sur nasa nen a tla muk ta a, chu chuan khuar a siam ta a ni.   Tin, lei tla muk hian Lei hi a nghawng lo niin a hmuna endiktu SDO Pu Lalmuanpuia leh Junior Engineer ten an sawi a. Vawiin hian he lei tlamuk hi thawktute hian leivungin an chhung khat nghal nghe nghe a ni. Vawiin vek hian Tuichang leh Keitum inkara kawng khuar chhe zual lai te leiin an hnawh khat nghal bawk. PWD Engineer leh thawktuten he Lei kaina an siam hi Serchhip IPRO Pu K. Saitluanga pawhin a telpui a ni.

Tuichang Lei hi tunah hian Central Road Fund Rs. 754.75 senga dawh that tuma hmalak mek a ni a. Hna hi M/s Sadguru Engineers & Allied Services Pvt. Ltd hnenah pek niin Double Lane PSC Girder a dawh tur a ni a, December 2018 a thawh zawh tura ruahman a ni a. Contractor hian tunah hmanruate lakhawmin foundation dahna tur te pawh an lai tan tawh nghe nghe a ni.