"Tuihna humhalh beihpui" kal zelah naktuk October ni 11 hian Champhai-ah Workshop neih a ni leh dawn.

He workshop-ah hian Pu P.C. Zoram Sangliana, Minister, Art & Culture chu khuallian niin khualzahawmah Pu T.T. Zothansanga, MLA a ni ang a. Inkhawm hi Pu P.C. Zohlira, YMA President, Champhai Sub-Headquarter chuan a kaihruai ang.

PHE Department leh Central YMA tangkawpin a buatsaih "Tuihna Humhalh Beihpui" workshop chu 8th August 2012 khan Vanapa Hall-ah Pu Lal Thanhawla, Chief Minister, Mizoram-in a hawnna hun a hman hnuah Y.M.A. Sub-Headquarters hmun hrang hrangah neih chhunzawm nghal a ni a; Lunglei, Serchhip, Kolasib leh Mamit-ahte neih a lo ni tawh a ni. Workshop neih apiang hian Group hrang hrang hnuaia Y.M.A. Branchhruaitute tel tura sawm an nih angin an kal tha thei hle a, Workshop Resource Person-te'n palai lo kal khawmte chu thu tha tak tak leh hman tangkai theih nghal turte hrilh leh zirtirin hun an hmang a,kalkhawmte chuan an hun hman chu hlawkthlak an ti thei hle.

Tunah hian khawvel buaipui ber pakhat chu tui chungchang hi a ni a, tuihna tha tak tak a kang zo zel a, he buaina hi Mizoram pawhin tunah hian a hmachhawn mek zel a, he harsatna lo thleng tur laka inven lawk hi tha tiin nikuma Central YMA General Conference, Kolasib-a neihah khan "Tuihna humhalh beihpui thlak" turin resolution an passed a, PHE Department nen thawkdun nghalin YMA Sub-Headquarter hrang hrangah hun an hman nghal a ni.