RTI Week India ram pumah 5th Oct. 2012 to 12th Oct. 2012 chhung hman tur a ni a, a hawnna inkhawm pawh District hrang hrang ah neih anih tawh laiin Lunglei District ah chuan rokhawlhna hrang hrang avangin a hawnna inkhawm hi neih theih a nih mai loh hnuah, vawiin chawhma dar 10:00 khan DC’s Conference Hall-ah tluang taka neih zawh a ni ta.
Hemi pual inkhawm, I&PR Deptt. leh DC’s Office tangkawp buatsaih ah hian Pu H. Lalhmingthanga, SDO(S) chuan kaihruaiin, khuallian Pu V. Sapchhunga Bawrhsap chuan RTI Act nihpung leh zawmzia te a sawifiah in hman dan pawh kan thiam chho ta zel a ni a ti. Bawrhsap chuan sorkar chu sum leh pai thu ah langtlang a ni tur a ni tiin, hetih laiin a nih ang taka thil tih theih vek loh pawh a awm ve thei tih asawi a. Ziaka awm kher lo sum leh pai hmanna te pawh a awm ve thei bawk a, hetiang hi khawi office ah pawh pumpelh theih lohva awm a nih avangin, hengah te hian a pawimawh ber zawka chu, engkim mai hi corruption anga kalpui a nih chuan a pawi thin a ni a ti.
Information pek chhuah chungchang ah fimkhur a ngaih thu sawiin, Bawrhsap chuan, “Information kan pek sual chuan hem theih kan ni a, chuvangin keimahni lam kan chian a ngai a ni” a ti. Information pek chhuah chungchang ah hian tu te pawh hian rang taka chet zung zung a hmalak vat vat hi kan tih tur a ni a ti bawk.
He huna paper present tura ruat, Dr. Andrew H. Vanlaldika, DCSO chuan RTI Act chungchang ah ngaihdan fuh vak lo awma a hriat thu sawiin, dik taka hna thawh a nih chuan, information pek chhuah leh zawhna awm thin chu huat loh tur a ni a ti a. Hetih laiin RTI hmang kher lova information pek chhuah zung zung theih a nih thu leh, chutianga pek chhuah zung zung a nih chuan RTI hmang kher lo pawh a mipui ten an hriat duh an hriat zung zung theih avangin a samkhai zawka a hriat thu a sawi bawk a. RTI Act chungchang ah hian a tir lamah kan pawm dan fuh chiah lo awma a ngaih thu sawiin, kan hriat chian loh avangin harsatna leh buaina a awm thei a ni a ti.
Vawiin a RTI Week hmanna ah hian sawihona hun te neiin ngaihdan hrang hrang ngaihthlak a ni a, Dept. hrang hrang a DAA, SPIO, SAPIO leh NGO lam aiawh te an kal tha hle bawk a ni.
