District AIDS Prevention and Control Committee chu vawiin khan an Chairman, Aizawl DC Dr. Franklin Laltinkhuma hovin a pisaah an thukhawm.
He meeting-ah hian District AIDS Control Officer Dr Vanlalfela chuan report pe in sorkar department hrang hrang a AIDS vei te tana hamthatna awm thei hrang hrang te sawiho a ni. Aizawl District chhungah April atanga September, 2012 chhung khan thisen unit 7109 pek niin chumi zinga unit 6699 chu Voluntary Blood Donation a ni a. A thlawna thisen pek hi za zela 94 a tling phakin July-September chhungah phei kha chuan a thlawna thisen pek hi za zela 99 a tling phak a ni.
Thla 6 kalta chhung khan Aizawl District chhunga ICTC 25 atanga HIV test neih zawng zawng zat chu 15450 niin chumi zingah chuan HIV positive 533 (3.5%) hmuhchhuah a ni. Naupai mi 5671 thisen exam zingah HIV positive 55 (0.98%) hmuhchhuah a ni bawk.
Aizawl District chhungah hian hmeichhia inzuar (female sex worker) mi 660 enkawl mek niin, inpawlna atanga kaichhawn theih natna hrang hrang lakah leh HIV lakah an him theihnan enkawlna uluk taka pek a ni a. Hmeichhe inzuar zingah hian zaa 2.6 tun thla ruk kalta chhung hian HIV positive hmuhchhuah niin enkawlna pek an ni bawk.
Hmeichhe inzuar bakah hian mahni mipatpui mutpui thinte mi 513 enkawl mek niin, damdawi hmanga inchiu thin mi 4904 chu HIV an kai tur venna lamah leh nunphung tha zawk an neih theihna turin enkawl mek an ni bawk.
