228/2025-2026

Dated Aizawl the 20th April, 2025 : Nimin zing khan Tuikual North huam chhunga hmasawnna hnathawh tur hrang hrangte bialtu MLA Pu Lalnghinglova Hmar hoin khawtlang hruaitute'n an sawiho.

Pu Lalnghinglova Hmar chuan, "Tuikual North hi Aizawl veng laili tak a ni chungin hmasawnna kawngah hmabak a la tam hle a, kan hun chhungin theihtawp chhuaha hmasawnna hna thawh kan tum a, ruahmanna awmte hi khawtlang hruaitute nen sawiho hmasak hi thil țul tak a ni," a ti. 

Tuikual North Local Council Chairman Pu F Kamhmunga kaihhuaiin Local Council House-ah Local Council member-te bakah YMA, MUP leh  MHIP aiawhte an kal khawm a, sorkarin hmasawnna hnathawh tura ruahmanna a siam chungchang an thlir.

Tuikual North huam chhungah hian Khelo India ațanga Multipurpose Indoor Stadium sakna tura sum lo kal tur hman a nih theih dan tur te, a hmunhmain a zawh leh zawh lohte bakah a kalpui dan turte inpawh taka sawiho a ni.

Hei bakah hian veng chhunga electric transformer thar bun te, Health Clinic awm mek chu Health and Welness Centre-a hlang kai tura sorkara ngenna thehluh chungchang te, veng mawng lama kawngpui sial tur Aizawl West Outlet chungchang leh veng hmasawnna tur thil pawimawh dangte an sawiho a ni.