227/2025-2026

Lunglei, 2025 Ṭau thla ni 19: Vawiin khan Lunglei Municipal Council (LMC) hotute chuan an Chairman Pu Lalzuithanga hovin Lunglei khawpui tui lakna Pialthleng hmun tlawhin, Public Health Engineering Department (PHED) hotute leh contractor te nen Lunglei khawpuiin tui harsatna a tawh ṭhin sut kian nana AMRUT 2.0 hnuaia cheng vaibelchhe 4.7 hmanga Tlawng lui tui khuah (gravity dam siam) hna thawh mek chungchang an sawi ho.

LMC Chairman Pu Lalzuithanga hi Vice Chairman Pu K. Lalrinawma, Executive Councillor Pu Zorinsanga Hmar, Executive Councillor Pi Lalhruaitluangi Sailo, councillor-te leh Chief Executive Officer, PHED Lunglei Water Supply Maintenance Division Executive Engineer leh MJA President te'n an ṭawiawm a. Tui khuah hna thawktu contractor, HS Construction ai awhte nen hna thawh mek dinhmun leh hmabak te an sawi ho a ni.

LMC Chairman Pu Lalzuithanga chuan ṭhal laia tui harsatna thleng ṭhin avangin tui khuah mek chu mipuiin zawh hun an nghahhlelh thu a sawi a. Nakkum lamah Lunglei khawpuiin tui harsatna lian tak a tawh nawn tawh lohna turin contractor te chu a hun takah ṭha taka thawk zo tura chahin, LMC pawhin Lunglei tui lakna thuam ṭhat leh tihchangtlun kawngah theih tawp chhuah an inhuam thu a sawi.

PHED LWSM EE Er V. Laldanmawia chuan Tlawng lui tui khuah siam mek chu nikum 2024 February ni 27-ah contractor nen agreement ziah a nih thu sawiin, a project pumpui atan cheng vaibelchhe 4.7 ruahman a nih thu a sawi a. Nikum lamah hna ṭan tura hmanrua lak khawm ṭan a nih laiin furin a nan avangin kumin February thlaa zawh tura ruahman chu zawh theih a nih tak loh thu leh hna thawh hun chu kumin August thleng pawh sei a nih thu a sawi a. Tui khuah chu metre 15 vela sang tur a nih thu sawiin, tunah hian hna za zelah 35 vel zawh a nih tawh thu a sawi a. Tui khuah hi AMRUT 2.0 fund aṭanga thawh ni mah se, central aṭanga pawisa dawn a la nih loh avangin contractor hnenah cheng eng zat mah pek a la nih loh thu leh contractor-in ama sum senga a thawh rih thu a sawi.

Lunglei Municipal Council hotute chuan Lunglei tui laknaa tui khuah mek chu chak zawka kalpui a nih theih nan theih tawp an chhuah dawn tih an sawi a. AMRUT 2.0 sum pawh a chhuah thuai theih nan hma lak an tum thu leh Lunglei tui lakna tihhmasawn zelna kawngah pawh theih tawp an chhuah tur thu an sawi a ni.