2409/2022-2023 

Aizawl the 24th October, 2022 : Vawiin khan Tuikual South Anganwadi Center No. 1 hawnna hun hman a ni a, bialtu MLA, Minister ni bawk Pu Lalruatkima'n a hawng.

Minister chuan thusawiin nu raipuarin ei tur ṭha leh damdawi ṭha a dawn a pawimawh em em a, nau a lo pian hnua hriselna ṭha a neih a, ei tur ṭha a neih a pawimawh. Nu raipuar leh nau piang enkawl a, naupang enkawltu Anganwadi kan ngaih pawimawh zel hi a pawimawh tak meuh a. Kan ram leh hnam lo la awm zel tur hi Anganwadi ṭha kan neih hian a hril thui hle a ni tiin a sawi.

Miniater Pu Lalruatkima chuan naupang chu a kalna awm kawngah zirtir la, a puitlin thleng pawhin a theihnghilh lovang tih a ni a, naupang enkawl ṭhat hi a pawimawh hle a. Nu leh nauin mamawh an neihte lamna tur leh naupang nun kaihruaina tur hmun Anganwadi hi a pawimawh em em a ni, a ti bawk.

Anganwadi Center no 1 hawnna hun hi Pi H Lalawmpuii, Vice Chairman, Anganwadi Co-ordination Committee-in a kaihruai a. Pi Zonunsangi, Secretary-in report pein Local Council aiawhin Pi Sangzuali Ralte-in thu a sawi bawk.

Tuikual South Anganwadi Centre No I building hi 2005 aṭanga sak ṭan a ni a, Pu Lalruatkima MLA fund pek ₹ 3,50,000/- hmanga sak zawh a ni.