2081/2023-2024

2023 Mimkut thla ni 29: Vawiin khan Tuirial bialtu MLA, Commerce & Industrial Development Board Vice Chairman Pu K. Laldawngliana chuan cheng nuai 204.94 senga Thingdawl RD Block Panchayat Bhawan cum Block Development Office building sak tharna tur lungphum a phum.

Building sak tharna tur lungphum phum puala inkhawm tawi buatsaihah Khuallian Pu K. Laldawngliana chuan Block Development Office chu thingtlang khuaa chengte tana office pawimawh leh chhawr ṭangkai tak a nih thu sawiin, Thingdawl RD Block chu Mizoramah pawh a hmasa pawl a nih anga office building changtlung tak sak thar a nih theih nana hma latute leh RD Minister Pu Lalruatkima chungah lawm thu a sawi a. Tuirial bialtu MLA boral ta, Pu Andrew H. Thangliana’n a ngaih pawimawh, a tih hman loh thil tam tak chu a ngaih pawimawh hmasak a nih thu a sawi rualin, MLA anga hna a thawh theih hun chhung a rei loh avanga a tih tur ang a tih zawh hman lohvah bial mipuite hriat thiamna ngenin, mipui leh khawtlang hruaitute leh NGO-te'n an thawhpuinaah lawm thu a sawi bawk.

Pu K. Laldawngliana chuan Thingdawla School of Nursing chu a nih dan tur ang a la nih phak loh avangin theih tawpa bawhzui mek zel a ni, a ti a. Polytechnic building pawh a function theih nan hma lak a ni a, PWD National Highway Division-III office building sakna tur pawh ruahman mek niin, Veterinary Dispensary building pawh sak zawh thuai a ni dawn a; Jordan Centre Seṭhawn-a thawktute thawh hun chhung pawh pawh sei a ni dawn a ni, a ti.

Kolasib District Rural Development Office-a Project Director Pu Lalmuan Puia chuan Thingdawl RD Block-in BDO office building thar an nei tur chu lawmawm a tih thu a sawi a. A hlawhtlin nana hma latu RD Minister leh Bialtu MLA te chungah lawm thu a sawi a ni.

He hun hi Thingdawl BDO Pi F. Lalnisai chuan a kaihruai a. Presbyterian Church of India (PCI) Thingdawl bialtu pastor Rev. Zairemkima'n hunserh hmangin, Thingdawl BDO Office-a APO Pi Mina Lalhmingthangi chuan technical report a pe a. Thingdawl BDO office-a Assistant Pi Lalvulluaii'n lawm thu sawiin hun a khar a ni.

Technical report-a tar lan danin, Thingdawl RD Block Panchayat Bhawan cum BDO Office sak thar tur hi MGNREGA kal tlanga hmuh niin, cheng nuai 204.94 senna tur a ni a. A dung fit 65.10 leh a vang fit 36.11-a zau tur niin, floor 4 (Ground Floor, Base Floor, First Floor leh Second Floor) a awm dawn a. A chung ber hi Conference Hall, mi 108 len theihna tura ruahman a ni dawn a. Base Floor leh First Floor hi Office tur niin, a hnuai ber Ground Floor-ah Chowkidar Quarters leh Canteen a awm dawn a ni.