2082/2023-2024

Champhai, the 29th September, 2023: Entertainment Society of Mizoram (ESM) buatsaih Mizoram Film Award 2023 sem chhuahna hun Vanapa Hall-a hman chu zanin khan Sports & Youth Services Minister Pu Robert Romawia Royte chuan khuallian niin a hmanpui. 

Khuallian Sports & Youth Services Minister Pu Robert Romawia Royte chuan tunhnaiah Mizoramin film industry leh entertainment lamah hma nasa taka a sawn chu chhuanawm a tih thu sawiin, hemi kawnga hmalatu leh thahnemngai taka thawktute inpekna fakawm a tih thu a sawi a. Film Industry tihhmasawn zelna tura Mizo Film Award sem chhuah a ni chu finthlak a tih thu sawiin, film chu eizawnna mai bakah hriselna kawnga pawimawh tak hlimna leh intihhlimna min chhawpchhuah saktu a ni, a ti a. Mizo tawng hmang ngeia film siam chu Zofate inpumkhatna leh inhriatpawhtawnna kawnga pawimawh tak a nih thu a sawi a. Tawng dang lehlin leh mahni inrawm chhuak ngei hmanga film siam Mizo zinga kan pung zel chu fakawm a tih thu leh film industry tihausatu pawimawh tak a nih thu a sawi bawk.

Pu Robert Romawia Royte chuan Sawrkarin film industry leh film development lam a ngaih pawimawh thu leh tihchangtlun kawngah hma a lak mek zel thu a sawi a. Kalkhawmte chu tunlai hmasawnna leh thiamna sang zel mila inzirthar tur leh film siam kawnga hmasawn zel tuma theihtawp chhuah turin a fuih a. Award dawngtu zawng zawngte thinlung taka a lawmpui thu sawiin, thlen china lungawi mai lova hmasawn tuma tan la chhunzawm zel turin a chah a. Mizo Film Award 2023 chuan Entertainment Society of Mizoram leh Mizo Film Industry hnuaia thawktute phurna thar a pek ngei a beisei thu sawiin, an kalzelna turah duhsakna a hlan a ni. 

Mizo Film Award 2023 semna hunah hian December 2021 leh vawiin inkara Mizo Film Industry mi leh sa boral 3 te sunna hun hman a nih bakah dan lova film tih put ruk leh chhuah chhawn (film piracy) duh loh zia lantir a ni a. December ni 21, 2021 leh August 2023 inkara Mizo film chhuak 50 te atangin category hrang hrang 12 ahte Award sem chhuah a ni. 

Mizo Film Award 2023 hnuaia Category hrang hrang leh Award dawngtute: