Tuivai Hydro Electric Project atana International Tender kumin June ni 6 a P & E Department in a lo tihchhuah tawh bawhzuina tur Pre- Application Conference chu vawiin khan Chief Secretary hova neih a ni. He Conference-ah hian he hna thawh tum, Request for Qualification (RfQ) Stage a tel, ram chhung hmun hrang hrang a mi Company/Firm lian tak tak paruk an rawn tel a, Tuivai HEP hnathawh dan tur hrang hrangte inkawhhmuh a sawiho a ni. Naktuk July ni 27 hian heng Company/Firm te hi Power & Electricity Department aiawh ten Project Site enpui turin a hmunah an kalpui dawn.

Tuivai HEP hi Power 210 MW pe chhuak thei tura ruahman niin a project hnathawhna tur (Estimated Cost) chu cheng vaibelchhe 1750 (2010 Price Level) a ni a. He Project hi Ngopa atangin 14 km a hla-ah Tuivai lui hi khuah tur a a ni a; Power House hmun hi tuikhuahna hmun atanga lui mawng lam, 12 km vela hla, Phuaibuang kai thlang lawka awm tur a ni.

Kum 2006 khan Department of Economic Affairs (DEA), Ministry of Finance ah Viability Gap Funding (VGF)-a tih turin rawtna thehluh a ni a. DEA hian Ministry of Power, Government of India in a enfiah(vet) tura an thehluh hnu ah, VGF anga kalpui turin Ministry of Power chuan a recommend ta a. Empowered Institution Meeting November ni 4, 2009 neihah khan Tuivai HEP, Viability Gap Funding atana rawtna chu a  siamrem a, India Infrastructure Development Fund leh ADB Fund atanga thawh turin a recommend leh a, tichuan DAE in a project hi Pilot Project Initiative atan a recommend ta a ni.

Empowered Committee May ni 5, 2011-a thukawm chuan he Project Transaction Adviser CRISIL Infrastructure Report chu thlirin hna thawk thei tur chin thliar nan Request for Qualification (RfQ) system a kalpui turin remtihna a pe a ni.