Saitual-Saichal-Hliappui kawnga Tuivawl lei chu nimin khan Home Minister Pu R.Lalzirliana'n a hawng. Hawnna inkhawmah hian Industries Minister Pu H.Rohluna chu khual zahawm niin Parliamentary Secretary pahnih Lt.Col.Z.S.Zuala leh Pu Hmingdailova Khiangte bakah Women Commission Chairman Pi Vanlalawmpuii Chawngthu te an tel a ni.
Pu R.Lalzirliana chuan ram tana rotling siam turin nghah peih leh dawhtheih a ngai, a ti. Saitual-Saichal-Hliappui road ah Tuivawl kanna tur lei, permanent bridge dawh zawh a ni chu lawmawm tiin hei hian a chhawrtu mipuite tan hun rei tak a daih theih a beisei thu a sawi a. PWD te chu a hun takah ruahman lawk aia sum seng tlema hna an thawh zawh theih avanga fakin Engineer an nih anga uluk taka hna thawk thin turin a fuih a. Mipui nawrna avanga hmanhmawh phili ai chuan dik takin, muang chang si lovin, khua rei daih tur, tha leh tlo siam zawk tur leh Zoram tana rotling nei turin mipui lam pawh kan dawhtheiha kan nghah peih a ngai, a ti. Home Minister chuan kawng tha neih hi hmasawnna kengtu a nih avangin a pawimawh a, chutih rual erawh chuan ramngaw kan suat a, nungchate kan umdarh a, hei hian khua a tilum a, tui harsatna a siam thin a, chuvangin mipuiin ramngaw a theih lai apiang humhalh a, thingphun kan uar a tul a ni, a ti a. YMA te pawhin Tuivawl lei dawhna leh a chhehvel chu reserve hmunah puanga humhalh se a duh thu a sawi a ni.
Khualzahawm Pu H.Rohluna pawhin thusawiin Tawi leh Lengteng Constituency inkalpawhna, Manipur thlenga hawlhtlang kawngpuia lei dawh hawn a ni ta chu lawmawm tiin hei hian nasa takin kawng a pawt tawi a ni,a ti. Industries Minister chuan sawrkarin mipuite tana hmasawnna hna a thawh hrang hrang te sawichhuakin hengte hi mahni chhungkua theuh tana hman tangkai nachang hre turin mipuite a sawm a, development lokal kan hman tangkai thiam chuan state changkang kan ni ang, a ti. Saitual-Saichal-Hliappui road chu National Highway a telh thar a nih angin sawrkar laipui suma chei that fo a nih tur thu leh he kawng hian Lengteng leh Tawi bial mipuite leh Mizoram pum tan malsawmna a thlen ngei a beisei thu a sawi.
Minister, Parliamentary Secretary leh Women Commission Chairman te hian Tuivawl lei bulah Mizoram State Tree 'Herhse' an phun theuh bawk.
Pu R.Lalrintluanga, SE, PWD, Eastern Circle report atanga a lan danin Saitual-Saichal-Hliappui Road Project hi NEC 10th Plan Scheme a ni a. October ni 5, 2006 khan he project atana DPR chu NEC in a pawm a. Tuivawl Built-Up Steel Girder Bridge hi he road project hnuaia thawh niin lei atana sum ruahman chu cheng nuai 356.68 a ni a. Contractor-in May 21, 2014 khan thawk zovin sum senso zawng zawng chu ruahman lawk aia tlem cheng nuai 328 a ni. He lei hi Saitual atangin 14km a hla, Saichal atangin 11 km a hla a ni a. Intermediate Lane National Highway Standard a dawh a ni a, a sei zawng 65metres, a zau zawng 4.25 meters a ni. Saitual-Saichal-Hliappui kawng pumpui 36kms ah hian Saitual leh Saichal inkar 25km a sei pavement tih loh hna dang zawng thawh zawh tawh a ni. Keifang-Ngopa-Tuivai Road, Saichal leh Hliappui kaltlang hi sawrkar laipui Ministry of Road Transport & Highways chuan 17.02.2015 khan hriattirna chhuahin National Highway tharah a puang a, a hmingah NH 102 'B' a vuah a ni.
Lei hawnna inkhawm hi Pu R.Vanlaltluanga, Engineer-in-Chief, PWD in a kaihruai a, Pu K.Lalsawmvela, Chief Engineer, PWD in lawmthu sawiin hun hnung a khar a ni.
