Nimin chawhnu khan Champhai Taxation Department chuan kum 2015-16 chhunga Champhai District chhunga chhiah (tax) pe tamte chawimawina hun, Circuit House Conference Hall-ah a hmang a. He hunah hian Champhai DC Pu Vanlalngaihsaka IAS chu khuallian a ni.
DC chuan Khua leh tui tha zia tilangtu chhiah pe tha chawimawi tlak kan nei hi a lawmawm hle a, Department pawhin hna athawk tha tih a lang bawk, a ti a. Sorkar hian mipuiin nun zalen tak kan hman theih nan 'Right' tam tak min pe a. Chumi rual chuan kan tih ve tur 'Duty' min tuk bawk a. Heng kan mawhphurhna awm ve tlem hi hlen ngei a, Dan zawm tura duan te tha taka zawm nachang kan hriat hian mihring changkang kan nihna tilangtu a ni, a ti a. Chhiah chawi ngaipawimawhlo leh duhlo tlat an awm thin hian insiamthat kan la ngaih zia a tilang ani, a ti bawk.
Chhiah pek chhungchang piah lamah pawh ram Dan in ti ve tura min phut hi chu khua leh tui tha kan nih chuan kan tih ngei ngei tur anih thu DC chuan a sawi a. Dan zawm ve mai lova thiltithei deuhte sawipui phut a, hre reng chunga kan tihsual rah seng tur ngei ngei pumpelh dan kan zawng hlauh thin hian kan rilru a changkangloh zia a tilang a ni a tiin, ram changkang leh hmasawn zawh apiangah Dan zawm an ngaihpawimawh thu a sawi a ni.
Function hi Pu Ngulzathuama, Superintendent of Taxes in kaihruaiin, Assistant Commissioner of Taxes, Pu P. Lalrinmawia chuan Taxation Department leh District Office hmalakna te a sawi bawk.
Champhai District-a 2015-16 chhunga chhiah pe tam ber chu St. Mary’s Gems neitu Pu Lucas Thangmangliana niin, chhiah Rs. 11,11,770/- a pe a. Ani hi kum 3 kalta chhunga Taxation Department kaltlanga bungrua a tihchetna sum Che vel chu cheng nuai 235.57 a ni.
Pahnihna chu Pi Lalengmawii, Kim Kim Agency neitu niin chhiah Rs. 8,87,670/- a pe a. Kum 3 kal ta chhunga a sum che vel chu cheng nuai 121.67 a ni.
Pathumna chu Pu Jeremy Zoremsanga Tochhawng, A&J Enterprise niin, ani hian chhiah Rs. 6,82,491/- a pe a. Kum 3 chhunga a sum Che vel chu cheng nuai 143.37 a ni.
Top 10-a lang dangte chu: 4th - Champhai Grape Growers Society (Rs. 3,62,408/—); 5th - AME Pharmaceuticals Prop: Rita Vanlalchhanhimi (Rs. 3,43,586/—); 6th - Vengsang Multipurpose Society (Rs. 3,00,259/—), 7th - Hmar Zote Store Prop: H. Vanlalhmangaihi (Rs. 2,68,770/-); 8th - Gilgal Hardware Store Prop: C. Hualdingpuia (Rs. 2,64,061/—); 9th - Mami Store Prop: Zonunsanga (Rs. 1,61,554/-), 10th - Rama Dawr Prop: Lalramliana (Rs. 1,60,200/-)-te an ni.
Champhai Zone Taxation Department hian Kum 2015-16 chhung khan Sorkarin target a tuk cheng nuai 331.33-ah cheng nuai 344.18 a thawk chhuak a. An target atanga 103.88% an thawk chhuak a ni.
Kum 2015-16 chhung veka Mizoram puma Taxation Department target hi cheng nuai 24,455.70 a nih laiin Department hian cheng nuai 24,976.09 a thawk chhuak a ni.
