Vawiin chawhnu dar 2:30 khan Administrative Training Institute (ATI) hotute kaihruaiin Mizoram Civil Service leh Mizoram Information Service-a lut thar training nei mekte chuan Mizoram Chief Minister Pu Lal Thanhawla chu a Office-ah an kawm.

Chief Minister chuan sawrkarin inrelbawlna tha neih a pawimawhzia hriain, sum harsa tak chungin a kengkawhtu tur officer thar Combined exam hmangin a la thin a, chu’ng zinga tel phak MCS leh MIS probationer-te chu an vanneihzia hre tur leh rinawm leh taima taka thawk turin a chah a. Sawrkar hnathawk chu sawrkar tan a rinawm hle tur a ni tiin, party awn bik erawh neih a that loh thu a sawi bawk. Hna tak tak thawk thei tur chuan inzir thar renga intah hriam reng a pawimawh thu leh lang tlang taka hna thawh a tul thu sawiin, Chief Minister chuan mipuite tana hamthatna hrang hrang awmte tha taka kengkawhtu ni tur leh duhsak bik nei lova an mawhphurhnate hlen chhuak thin turin a chah bawk.

Chief Minister chuan social media thang chak lutuk chu MIS officer-te tan phei chuan chona lian tak a ni tiin, mipuiin an hman sual vengtu ni tur leh sawrkar thu dik leh thil tangkai atana hman dan kawng kawhhmuhtu ni turin a chah a. Mizoram hmasawn nana tha taka thawk thei tur chuan tlawmngai pawl hrang hrangte nena thawh hona tha tak neih a pawimawh thu sawiin, chuti ang ni tur chuan probationer-te chu duhsakna a hlan nghal a ni.

He hunah hian probationer-te’n Mizoram sawrkar hma lakna hrang hrang hriat fiah duh an neihte chu Chief Minister hian a lo hrilhfiah bawk a ni.

MCS leh MIS Probationer-te hi ATI Director Pi Ramdinliani leh Joint Director Pi Angela Zothanpuii te’n an ho va. Tun tum Foundation Training hi MCS Probationer 10 leh MIS Probationer 4 te tan ATI hian April ni 1 atang khan a buatsaih a. MIS te chuan vawiin khan training hi zovin, MCS Probationer-te hian thla 3 dang an la neih chhunzawm ve thung dawn a ni.