No.584/2021-2022

Lawngtlai, Tomir thla ni 19, 2021: Tun hnaia Lawngtlai District chhung hmun eng emaw zata kangmei chhuak chungchangah vawiin khan State Level Special Investigation Team leh Lawngtlai District Forest Fire Prevention Task Force te chuan video conferencing hmangin virtual meeting an nei.

April, 2021 thla tawp lama Mizoram hmun hrang hranga kangmei chhuak/ram kang chungchangah a chhan leh a vang chhui chiang tur leh hemi kaihhnawiha dan ding lai awm mek te zir chiang a, a tul anga hma lak dan tur rawtna siam turin Mizoram sawrkar chuan May ni 5, 2021 khan State Level Special Investigation Team (SIT) dinin, thla 2 chhunga report peih fel hman tura tih an ni a. SIT-ah hian Mizoram Chief Conservator of Forests (Administration) Pu RS Sinha chu Chairman niin, member dangte chu Pu C. Lalthanmawia, Director, Fire & Emergency Services; Pu Lalthafamkima Jongte, AIG (Ops), Police Headquarters leh Pu John LT Sanga, Director, Disaster Management & Rehabilitation (Member Secretary) te an ni.

Vawiina virtual meeting hi SIT Chairman Pu RS Sinha, Chief Conservator of Forests (Administration) chuan kaihruaiin, SIT member dangte bakah, Lawngtlai District atangin Deputy Commissioner & District Disaster Management Authority Chairman Dr Andrew H. Vanlaldika hovin District Forest Fire Prevention Task Force member-te'n an chhim a. Tun hnaia Lawngtlai District chhung hmun hrang hranga kangmei chhuah dan te, a chhuahna hmun te, kangmei thelh a nih dan leh hemi chungchang chhui mek dan te sawi ho a nih bakah, kangmei hmachhawn tura hmanrua leh mihring neih dan te uluk taka thlir ho a ni.

Meeting-ah hian kangmei chhuah thulha rang zawka chet lak a nih theih nana hma lak tul te, bungraw mamawh te, mipui hnena zirtirna kalpui dan tur te, kangmei thelh tura thlan chhuahte training pek dan tur te, kangmei chhuah thulha rang taka mipuiin report an theh luh theih dan tur te, hemi chungchanga technology hman tangkai theih dan te leh tlawmngai pawlte leh khawtlang hruaitute leh mipuite nena thawh hona tha chhawm nun a, hma lak tlan zel dan tur te sawi ho a ni.