Vawiin khan CDAR Complex, Tuirial Veng ah Ministry of Oil and Natural Gas, Government of India leh CSIR – CMERI, Government of India chuan Technology Dissemination Workshop an buatsaih a. An thupui ah “Tung rah atanga Bio Diesel siam” tih a ni. Pu P.L. Thanga, Member Secretary, State Planning Board leh Vice Chairman, NLUP Implementing Board chu khuallian niin, Sawrkar Laipui aiawhin Scientist 7 he Workshop buatsaih tur hian an lo kal a. Tung chingtute mi 50 chuang zet an kal khawm bawk a ni.

Workshop ah hian Tung rah sawngbawl dan leh hlawk zawka kalpui dan tur bakah Tung rah atanga Bio Diesel siam a, Tung chingtuten hlawkna tam zawk an hmuh theih dan tur sawiho a ni a. Tung chingtuten ten an hlawkpui hle a ni.

Workshop hmanpuitu khuallian Pu PL Thanga chuan thusawiin Tung rah sawrna khawl tha a awm loh avangin Tung chingtuten kum 2002 vel atang khan marketing problem an nei a, he harsatna sukiang tur hian NLUP hnuaiah Tung trade hlawhtling zawka kalpui  turin NLUP Implementing Board (NIB) leh CDAR hotuten Chief Minister remtihna in CSRI-CMERI, Govt. of India scientist hote hnenah Tung khehna khawl siam turin an ngen a, tunah hian CSRI-CMERI scientist hote hian Tung khehna khawl mai nilovin Tung oil atanga Bio-Diesel siam dan tur thlengin an ruahman chhuak ta a. An khawl siam enchhinna turin Tung rah 50 kg pek an ni a, uluk taka enchhin anih hnu in a tangkai hle dawnin a hriat ani a ti a, hetianga hma lakna thar avang hian Tung chingtute te tan beiseina kawl a eng tan mai nilovin Tung rah atanga Bio Diesel leh thil tha tam tak siam chhuaha Mizoram mamawh siam chhuahna hmanrua ni turin hma lak tum a ni a ti bawk. Tung chingtuten ten taima taka an kalpui theih chuan, kum 2011 atang tawha Mizoram Chief Minister Pu Lalthanhawla thahnemngaihna leh hmalakna hian rah tha tak a chhuah ngei beisei a ni a, chuvangin Tung thing hi rei lo te ah thing anchhedawng ti a an sawi thin chu malsawmna thing ah chantir thuai beisei a ni a ti.

Tung rah khehna khawl pathum chu CSRI – CMERI hian a thlawnin NIB ah an pe dawn a. Tung chinna hmuna hman turin pekchhuah leh ani ang. Hemi bakah hian scheme anga Tung chinna, sawngbawl (process) na leh Bio Diesel leh Tung rah atanga hamthatna chi hrang hrang hman tangkai dan tur CSRI – CMERI Scientist ten kum 6 dawn lai research beia an zirchian hnua an hlawhtlinna hi Mizoram tana hman tangkai anih theih dan tur he workshop ah hian sawiho a ni a; Sawrkar Laipui leh Mizoram Sawrkar tangduna Scheme thar anga kalpui dan tur ruahmanna chu CSRI – CMERI hian NIB ah kar hnih chhungin rawn thawn nghal turin rel a ni. 

Vawiin Workshop ah hian Mr. Surendra Pratap, Director (RED), PCRA, Ministry of Oil & Natural Gas, Govt. Of India chuan Tung rah tangkaina leh a chingtute hamthatna tur hrang hrangte a sawifiah a. Dr. Krishnendu Kundu, Principal Scientist/Head of Department of Biofuel CSIP-CMERI COEFM, Ludhiana-in Tung rah atanga Bio Diesel leh thil tangkai dang chi hrang hrang siamchhuah dan a zirtir bawk.