Nimin khan PWD Minister Pu Lal Thanzara chuan Tuirini lei siamthat hna thawh mek chu a hmunah kalin hnathawh chin leh hmabak la awm a en a. Minister hi PWD Engineer-in-Chief Pu R. Vanlaltluanga, Chief Engineer (Highways) Pu K. Lalsawmvela leh PWD engineer dangten an tawiawm a ni.Turini lei siamthat hna hi ‘Reconstruction of Double Double Reinforced (DDR) Bailey Bridge over R. Turini at 24.5 Kmp on NH-150’ tih a ni a. Tunah hian Bailey Bridge innghahna tur cement concrete in siam mek a ni a, ruahman dan leh tluang taka hna thawh a nih chuan May thla tawp lamah lei innghahna tur cement concrete structure hi peihfel beisei a ni. Hemi zawh hian Bailey Bridge hi PWD Mechanical Division in an dawh tan ang a, anni lam hian June thla velah lei dawh hi an peihfel an beisei a ni. 

Minister leh PWD hotute hian lei siam a nih chhunga pumpelhna kawng (diversion) hman mek te pawh an en leh a, hume pipe phum a tlem deuh avangin tui a len hma in hume pipe dang phum belh ni se tiin ruahmanna siam a ni a. Hemi bakah hian pumpelh kawngah boulder phah niin a grade siamthat a ni tawh a, hei hian engemaw chen motor tlante harsatna zualpui a sut kian theih beisei a ni.