1966-1986 (TUNHMA KUM 20 LIAMTA KHA)
March 1, 1966 : Nipui a thaw dawn tan. Thlasik khaw vawt vur pawhin min kiansan ve mek a. St. Paul's High School, Aizawl-ah pawl sarih ka zir kum a ni a, a thiam theilo ber chu ka ni biklo in ka hria. Chuan le, tu emaw hian, "Vawiin chhun dar 12:00 atangin Curfew a ni dawn," a rawn ti ta thut mai a, curfew hming ringawt pawh kan hriat vawikhatna a ni a, a awmzia kan han inzawt kual te te a, mahni inlam panin kan tlan haw ta dam dam a. A bak chu in hriat vek kha : RAMBUAI.
Kan chhungkuain Reiek-ah kan tlanchhia a. Ailawng khaw thlen hma Buiman tlang atangin Aizawl khawpui kan han thlir let a, meikhu tur ngun mai leh mei alh sen zuai zuai bak engmah a lang lo. Aizawl khawpui chu meivapah a chang zo ta. Hnuk a ulh, thin a rim, bei a dawng, a hrilhhaithlak. Reiek khua-ah hian chawlhkar khat vel kan cham a, Aizawl lam panin kan in ak chhuak leh ta hnak hnak a. Sipai thupek ni ngei tur a ni, "In tinah flag var zar tur," an ti a, pawnchhe var kan khai far a, a tlawmngaihthlak duh hle. "Remna kan duh e" tih lam ai mahin "Dawl zawrin kan zawr e" tihna a kawk zawk mahin ka hria.
Chuan le, zanlamah min curfew hnan chho ta tluk tluk mai a. Khawvela curfew rei ber 'World Record' kan siam ta hial awm e. Khuahkhirhna hnuaiah hian zalen chakna a lo chhuak rang duh khawp mai a. A hma zawng pawha lengkhawm châk ngai reng reng lo kha lenkhawm châkna thlarau a lo thleng anih pek kha. Zantin khel lova teichhuah a ngai ta tlat mai. Zai lah kan zai tui thei. Khang hunlai atang khan ania "Thil tha kan hmuh ang hi," tih hla vel ka hriat ve. Kan veng kha a lo kilkhawr deuh bawk a, sipai patrolling pawhin min rawn thleng zing peih vak lo. Curfew e tilo chuan kan free letling phian.
Khang hunlai khan nula rim rual kan la ni lo deuh a, mahse curfew vanga bialnute rim theilo te zawng an lung a lo leng hle ni ngei tur a ni, "Curfew kara suihlunglen" tih hla te hial a lo pianchhuah phah ta a. Rambuai ta chu jail bang zut tawk an indawt ta zut mai a. Pu C.Durthanga "Jail Runthim" hlate chu a hunlaia hla awmze nei leh sak tlanglawn ber pawl a lo ni ta.
Kum sawmli zet a liam ta bawk a, hriatrengna a lo kiam ve telh telh si a, duh angin a kimchang thei tawh lovang. Mahse benga cham reh theilo tlem a zawng tal i han thailang hrâm dawn teh ang. Jim Reeves-a hla thulkhung This World Is Not My Home chuan zoram hmun tin, kil tin a fang a, keini naupang te phei chuan Volunteer (MNF Sipai) ho hla emaw kan ti hman hial. Beatles hla hmasa ho, Love Me Do, All My Loving, Ticket to Ride, etc. te chuan min rawn rûn chho mek bawk.
Khang hunlai khan TV, tape recorder, record player chu sawi loh radio nei pawh kha chhiar tham chauh tak tak an la awm a, company kutchhuak guitar nei pha pawh ui hum lek tak tak an la ni. Thingremzaithei (gramophone) kha a neinung deuh khan an nei a, a battery pawh awm lo, a li pek chawp ngai leh a pin tahhriam chawp ngaite kha a la ni a, Mizo tawnga record awm chhun te pawh lengkhawm zai tlem leh Beram Bo leh Nova Lawngtuk tih vel mai a la ni. Ngaihthlak tur awm chhun a ni bawk a, kan kilbial nileng peih ve tho. Khang gramaphone record te kha a keh hma em em a, thlauh palh a dawl lo hle. Mahse record kehthem kha rul chuk damdawi atan a tha an tih vangin kan roh thei hle. Tak tak ni maw?
AIR, Gauhati, Mizo Programme kha April 1, 1957-ah hawn a ni a, khang hunlai chuan radio nei chhun chu tlem te tak tak an la ni a, inthehlarna hmanrua atan hman tlak a ni meuh lo. Mahse kan zaithiam hmasa te'n radio tlemte hmangin Zoram khawvel an tuam chho tan mek a. Pi Thanthuami'n khuang khat nena a zaituahrem hlate chuan mite hriat a rawn hlawh chho a. Rambuai hma lawka Liverpool tlangval/tleirawl rual, Quarrymen inti mai thin te'n hmingthar invuahin Beatles an rawn inti thar a, khawvel hi an music hmangin an rawn hnehlak a ni ber a. Khata tang khan rimawi-a tuihal khawvel pumpui hi a nghing a ni ber e. Chu Beatles tuifawn (tsunami) chuan Zoram a rawn nghawng thleng a, Elvis Presley leh Beatles hming hre lo fa chu chhiar tham lek tak tak kan ni ang - Zoramah pawh.
Kan hranghluite kha hriatkim an har tawh khawp mai. Sensiari tih hla leh Laikunga tih kha chu ka la hmehbel thiam khawp a, Liansailova leh a pawlte, Ricky L.Rinliana, Roy C.Sangzuala, Jessy Lalrova te kha kan hriat tlanglawn zualte chu an ni ta mai awm e. "Kan Intawhna Lamkawiah (Tleitira Tleitiri)" tih hla Joe Ngurdawla sak ngat phei kha chu kan tunlai music tam tak ai hian a advance fe zawk. Mipa lam hi an tuan a tha deuh ni ngei tur a ni. Khang hunlai khan an lar tam zawk tlatin ka hria.
Hmeichhe lamah chuan Vanhlupuii leh Thantluangi bak kha kan nei vak lova, mi rilru-ah pawh an tlak dan a sang hle in a lang. Anni pahnih hming hre lo chu khang hunlai kher kha chuan pa khaw hawi tawi tak an ni hrim hrim. Tichuan rambuai kum 1966, July 31 khan Aizawl khawpuiah AIR chuan station thar an rawn din ve ta a. Programme hi zanlamah chauh pekchhuah ni mahse mahni tawng ngeia ngaihthlak theih radio station kan kawtchhuaha an han hung ta chu 'Lung lawm a kim' kan ti hi a ni ber mai e.
Radio lo chu rimawi lama inhnangfakna dang kan ngah lo nasa mai si a. Record player nei tlemte lahin an keipui sa hauh hlur mai a, keini ang rual tan chuan han beisei chhin ngam chi pawh a ni lo. Chuvangin radio kha a hlu lo thei lo. Siampuii Sailo chuan Mizo hnap maiin khawhar hla leh rual û zawkte lung tileng chi hla a rawn vawrhchhuak a, Zoram dung leh vang, kiltin ah Siampuii hming hre lo fa an awm lovang. Tunlaia Hmar nula Ruotmawi ai hian a lar dan a nep bik miah lovang. Kha'ng hunlai khan zaithiamte chawisanna chang kan la hre lo lehnghal.
Chutah Vanhlupuii nau Vanlalruati chuan Lalsawta hla, "Enga'n Ka Lo Tawn Che" tih chu a rawn lar chhuahpui ta hluai mai a. Kha kha lengzem khawvela thangtharte kan harhchhuahna kawngka niin a lang. Vanlalruati zaithiam dan hi chu a 'pucca' thlap mai. Champhai lam chuan 'ataa zaih' an ti ngei ang. A lar pawh a lar reiin a tlo kher mai. A ni anga zaithiam hi an piang leh thei tawh lovang e tih khawp hial turin a ni kha chu a 'sial' a ni ber mai.
Mipa lamah Reiek khaw tlangval kawm nuam leh phawk Ngurliana Sailo chuan a 'Darbiahnemi' hmangin Zorimawi khawvel chu a rawn chhekarbawm leh ta a. Ani pawh hi, "Hei zet hi chu a aia zaithiam an piang leh thei tawh lovang," kan lo ti leh hman pek a. A hunlai na na na kha chuan Ngurliana kha lar vet vet tak a ni. A hlate kha kan lo kurpui ve thei nasa. A aw ki kha a sang a, kan mipa zaithiam hmasa te kha chu aw lian leh aw tha hluah hluah chi deuh vek an ni a, khatia aw ki sang vah maia style thar a rawn siam khan Ngurliana kha a vawrhsang hle niin a lang.
A hunlai na na na chuan Remsangpuii'n 'Fur khawthiang' a sak khan min la hneh deuh berin ka hria. A aw no leh sexy zet mai kha a hmangthiam a, hla thlan hun a luah hnemin thlangtu pawh an thahnem thei na ngiang. A hnu-a 'Sangpui Ka Ti Che Kohduat Nan' te pawh khan hlathlan hun a luah zing malh malh hle. Khang hla kha Sanglianthanga te hian tingtang an perhsak ta tlatin ka hria. Ka hre dik ang chu maw!
Zorimawi khawvela bung thar min hlangkaitu pakhat chu Hnamte unau ho kha an ni chiang mai. Lalremsanga Hnamte leh a naute (Lalthangliana leh Zirkunga @ Zira Hnamte) te chuan Mizo Music thar, Style thar an rawn siam chhuak a, an Hnamte pui Zirsangzela Hnamte leh Ramhluna Hnamte te ho nen Shillong tlang atangin zoram hi an rawn chhoh thlir a, thangthar hla mawi zet zet an rawn phuhchhuak ta zung zung mai a. Kha'ng hunlaia Shillong-a lehkhazir a awm mek Thingsai khaw nula Lalsangzuali Sailo chu Zorimawi khawvela hming dai leh ngai tawh lo turin an rawn vawrhchhuak ta nawlh mai le. Khatih hunlai kha Vanlalruati lar vanglai a ni a, Ruati û, U Vanchhinga ngei pawhin Theatre Hall (tuna Vana Pa Hall) kawtah hian min pawt ding a, "Ruati aia zaithiam Lalsangzuali Sailo zai hi i ngaithla ve tawh em?" tiin min zawt hial a sin.
Keipawh kha'ng hunlai kha rimawi khawvela ka intah luh tan lai vel niin ka hria. Lalremsanga (Hnamte) leh a pawl te'n 500 miles dungzuia an hla siam 'Hmangaihna' te kha a kel rel a kel rawlin kan thian zahovin kan thlek pui ve bawng bawng thin anih kha.
Aizawla AIR a rawn inbun ngheh ve takah chuan zaithiam pawh kan ngah sawt hle. Bakah Shilllonga lehkhazir a awm leh Shillong tlanga khawsa nghet ho khan zai leh rimawi kha an intihhmuh a, Zoram lama kan neih ve ngai reng reng loh Thalfavang Kût te huaihawtin zai leh rimawia inelna chi hrang hrang an lo siam tawh thin a. Kha'ng khan nasa takin Zorimawi khawvel hi hma a sawn tir chiang mai.
Chhuihthangvala tia kan hriat lar zawk mah Lalnunmawia (Valte-a) aw tliang tham mawi tak chuan Zoram dung leh vang a rawn nghawr nghing a, C.Lalrinmawia aw lian leh pa zet mai chuan thalai rual thinlai mu hnu a rawn kai tho takzet a. Liandailova Chhangte chu a hre lo fa an awm ta lo. Hmeichhe lam pawh an duai bik lo, Lalhlimpuii, Vangsangkimi, Vanlalhmangaihi, Saizikpuii Sailo, Laltlanthangi Pachuau, Lalneihthangi, Zothanpuii te ho chuan hla thlan hun an luah zing malh malh kher mai. Tunlai angin duh duh huna hmehchhuah theih Demand Channel a la awm ve hek lo, radio-a hla thlan hun nghakin radio nei inah a hun leh a darkar nghakin kan thu thap thin.
Music instrument lamah pawh kan thang nasa. Tunhma chuan guitar thiam sawi tur an tlem hle. Chhim lamah Saikhuma chu Sai-Guitara tia hriat lar anih laiin hmar lamah R.Sangzuala chu Sang-Guitar-a an lo ti mek bawk a. Tih tak takah chuan electric guitar kan hmelhriatna pawh khuarei a la ni hlei nem. Company kutchhuak pick-up te hmuh phakah an awm loh miau avangin magnet leh copper coil kan zawng khawm a, kan hlum char char a, guitar pick-up changkang vak lo chu kan chhuah ve mai zel zawng anih kha. India siam electric guitar lo thleng hmasa pawl chu Reynolds Company siam kha a ni ta mai awm e.
Phai lam band tha te paw'n min rawn tlawh ve ta zauh zauh a, ka la hriat chian te zingah chuan Pu Rosangliana pawlte, Agents ho khan Theatre Hall-ah show an rawn nei a, kan ngaisang bon top! Joseph Zokunga'n bass guitar hruipui a pawh zoh zoh lai mitthla-ah a la cham fo. Anni hi Mizo tlangval hlang an ni bawk a, an thiam kan ti mai pawh a nilo, an mak kan ti a ni ber mai. Chutah Makuri (Rebecca Saimawii) pa Bing Crosby leh a pawlte The Fentones an rawn chhuak leh a, an ni hi India pum huap Simla Beat Contest-a lawmman pakhatna dawngtu an ni bawk a, kan ngaisang leh rem rem khawp mai. Ob-la-di, Ob-la-da leh Sugar Sugar an sak chu ka la hrechiang. An guitarist Sherlock Giri a ni tih pawh ka la by-heart ve vang mai. Khami tuma an vocalist in tambourine a hman kha ka hmuh vawi khatna.
A hma lehzual tawhah khan The Beginners te leh The Flamingoes band ten an lo indin tawh thinin an sawi a, mahse anni khan hnuhma an ngah tehchiam lo ni ngei tur a ni, thawm an neih zui vak lo. Khatia ram pawn lam band te'n min rawn tlawh phur tak zeuh zeuhah chuan local band te an rawn ding chho ve tan tak tak a. Chaltlang atangin Lalkunga te, Sanga te hovin Samtlang Dingdi (SDD) an rawn din a, anni hi Er. K.Thangzuala (ex-minister) thlazar hnuaia ding an ni ta in ka hria. CCR hla hmasa ho kha an sa tlangpui. Anmahni an hmeltha tlang bawk a, an hunlai khan an lar vet vet hle.
Kan local band hmasa te zinga lar ziktluak ta ber chu JB-a, Saichhunga, Engzuala leh PB Liantluanga te band din Young Generation kha an ni. JB-a kha rimawi mai bakah literature lamah a lo ril zek a. Rock Edict No. 13 hla a phuah te phei kha chu Indian History ruih mai a, pui tak a ni. Cover song bakah JB-a irawm chhuak sap hla nalh tak tak an sa hnem hle. A hnu daiha JB-a min hrilh leh danin kha band-ah khan ka lo tel ve teuh hle a ni awm e. Anni pawh band member te an inthlak zauh zauh. Crimson Dust intih chang an nei a, Exodus pawh an invuahin ka hria.
Chu'ng hunlai chuan mi pakhat thalaite activities a tui em em mai a awm a, a hming chu Pu R.L.Thanzawna a ni. Amah hrechiangtu leh ngainatu te chuan Pu Zawnte-a an ti theuh a. Mizoramin UT Sawrkarna kan neih a Sawrkar department hrang hrang remfel a lo nih khan Pu Zawnte-a hian Information, Public Relations & Tourism department-ah Director nihna a chelh a. Ani ho hian alawm Beat Contest chu an huaihawt thin. Khatia Pu Zawnte-a hova Beat Contest an han huaihawt zauh zauh takah chuan zaithiam thar leh band thar an rawn inlar ta sup sup a.
AR Cinema Hall-a Beat Contest an huaihawt tum ngat phei kha chu bon tak a ni. Lammual kotlang zawng zawng hi mipuiin an khat a. Vanhlupuii te unau The Vans ho khan boruak an siam nasa ber mai. An drummer lah kha drummer lar Saithangpuia a ni a, drum solo a'n bei tak tak mai chu sawh a bawl hi a ni berin ka hria. Beat Contest khan rimawi khawvelah hma min sawn tir nasa hle in a lang. Khang hunlaia kan local band te kha an hming a nalh thei nasa. Diamond Cross, Don's Waving Beat, Flaming Splinters, Generation Express, etc. te vel ni ta in ka hria.
Kha'ng hunlai khan thalaite khan guitar chu an perh ve thei mai, mahse duhthusama khuang han vaw mai thei kha kan tlachham deuh niin a lang. Peter C.Lalrinmawia leh Nghilhlova te kha kan chhuanvawr ber pawl an ni. Peter-a han sawi takah chuan James B.Ralte (guitar) leh Valzote-a (bass) te nena an band Three Men Wizard (Rock Wizard) te kha band tha ber pawl an tling. Mahni-a live concert huaihawt ngam ngat kha an ni ve a. An concert siam tawh chu 'Sold Out' a ni deuh zel. Khang hunlai khan music track hmanga concert siam te a awm ve ngai lova, a bungbawr a bungbawrin inputchhuah a ngai a, music track te la awm ve ngailo. Hlu bik veng veng tak a ni. Concert siamtu te kha hah pawh an hah thin ngawt mai. Tunlai chuan CD 3/4 an ak zeuh a, a zo der.
Tlem tlema Zorimawi Khawvela hma kan sawn bek bek laiin khawchhak lam atangin Zorimawi Khawvel chu min rawn hnehlak ta thut mai a. Zodi leh Vulmawi an rawn chim thla. T.Zorampela, Butta, Lalruanga, Lalhlunmawii, Lalenkawli te hming chu Zorimawi kalhkimtu an ni ta der mai. C.Luri'n-a Tlaitla Eng album Rangoon-a a han siamte chu a recording a that bik em avangin a copy kan inchuh luih luih mai chu a nih kha.
Tunhnu hian Vulmawi hla hlui ho kha ka ngaithla zauh zauh a, kan tunlai music hian an ne pawh kan la ek pha lo kher mai. Hmanrua te a tha tawh a, kutthlak te a mawi hle zawk a. Mahse music kalphung leh a melody hrim hrimah kan tunlai music hi ka la dah hniam zawk fo mai. Tunhma chuan Jeetei Recording Studio kha kan recording studio neih hmasak pawl a ni mai a, kha studio atang khan RTC Lalduhawmi te, R.Vanlalnghaki te, Sailothangi Sailo te, Peter C.Lalrinmawia te khan an album hmasa ho kha an siam a, chutah Valtea'n pui tham deuh takin hmanraw changtlung zawk nen Otto Recording Studio a rawn siam a, musician tha ber ber nen kan ziaawm chho ta hle a. Tunah ngat phei chuan Aizawl khawpui mai bakah district headquarters tinah recording studio changtlung tawk kan bun ta fer fur mai. A lawmawm e.
Kan sawi ta nual a, sawi awm tak sawi hmaih pawh a tam ang tih a lang reng. Kum 1966-1986 chhung hi Zorimawi khawvelah chuan upa ho sawi dan takah 'Thing leh Mau Innawhlai' a ni a, awm lo ata awma kan insiam chhoh a pawimawhzia kan hmuh chhoh lai vel a ni a, hnam dangte el pha tur chuan kawng thui tak zawh kan la ngai a ni tih te pawh kan hmuhchhuah ruau ruau hunlai kha a ni. Kum 1969 August thla-a Woodstock, New York hmuna hippies leh musician nuai nga rual zet pungkhawmin 3-days Music, Peace and Love Festival in a nghawng chhuah te pawh a ni ve nawk mahna.
1986 - 2006 : (TUN KUM 20 KAL MEK HI)
Tom Jones leh Englebert Humperdinck te lar vanglai kha in hre pha ve em? Delilah, Man Without Love, Ten Guitars, Help Me Make It Through The Night vel kha in hre lo maw? Anni pahnih lar vanglai kha rimawi khawvela kan hniam ber lai tiin sap ziaktu ho chuan an sawi thin. A chhan ni awm bera an sawi chu concert naah mipui hnungchhawn an ching an ti. Zai chu an thiam, mahse entertainer an tling lo an tihna a ni ber ang.
Khatiang hunlai ang kha Mizoramin kan tawng ve em aw? Thil kha kan lo chhinchhiah thlip thlep tawh mang silova, hriat a harsa tawh riau. Enga pawh chu nise thil pakhat erawh a chiang. Ngopa piah lawka khaw rualrem lo zet mai Khawkawn khua-a piang, a naupan lai pawha nausen chum nei bik vaklo hmel pu Rosangliana chuan a Zorock album a rawn vawrhchhuak ta thut mai a le, Zorimawi khawvela muthlu mek Zoram thalai rualte chu an phu suau mai mawle! Phu suau zingah hian kei pawh a phu nasa pawl niin ka inhria. Zoeng music columnist ka nih lai a ni a, Zoeng Magazine lar vanglai a ni bawk a, Zorock chanchin hi vawi engemawzat chu ka ziak tih ka inhre chiang. Amah Rosangliana ngei pawh Mission Vengthlanga kan inah lo lengin inkawmna hun tha tak kan nei nghe nghe. Kha album-a Rose-pari ngat phei kha chu tunhma leh tunhnu-ah a aia hla mawi a chhuak bik chuang lo.
Heng hunlai atang hian a ni mai thei, rimawi thiamte leh zaithiam hote ngaihsan na chang kan rawn hre chho ve ta hret hret a. Khawchhak lam atangin music thiam tak takin min rawn finthla zel a, recording studio thar a rawn pian belh zel a, tu studio kuthnu nge mawi ti-a duhthlan tur te pawh kan ngah ta. Hei hian rimawi khawvela kan than chak zia a entir hle mai. Studio hmanrua pawh world class kan hmu phak ve tawh a, tunhma lama ngaihruatin lunglen a hril chang chang kan tih thin kha tunah chuan duhthlangin kan let ta a ni ber mai.
He kan hun hnihna-ah hian mipa lam aiin hmeiche lam an rawn che tha chho zawk mah a ni awm e. Rebecca Saimawii, hmeichhe hleitling leh hmeltha chuan boruak a rawn siam lian chho hle a, Otto Band leh mimal angin Zorimawi khawvelah a thawh hlawk ber pawl a tling. Lalrindiki Khiangte chuan Daduhi hming pu in hma a rawn la chho mup mup mai a, Venghlui nula hleitling leh hmeltha zet zawng chelh rual lohvin a rawn duk chho pur pur a. Nula leh tlangval, naupang leh rual < lam chenin Daduhi hi kan ngaihzawn rawn a ni ber e. A aw special lutuk, tuma imitate ve theih loh hi Zoramin kan ngaithla kham thei thlawt lo a ni ber mai.
Zaithiam chhuak thar pawh kan ngah narawh. Zoram kil tin kil tang atangin an rawn hmur tuam tuam a ni ber a. Hlawhtling fe fe an awm laiin album siam ve ngawt, copy za >m pawh hralh lo pawl an kat nuk tho niin a lang. Englo alawm, mahni calibre leh capacity chh<t miah lovin thenkhat chuan, "Cassette siam ka tum ve a," tih atangin an han in la high hmasa ngawt zel bawk a ni. A dik chiah sawi chuan a hunlaia album hralh kal ber pawl Project Mengmawii pawh kha copy singkhat kan hralh pha lo deuh tlat. Chuvangin a insawi hralh kal nazawng hi chu ngaihdan tawk thiam a ngaiin ka hria.
He kan hun hnihnaah hian live band thar an rawn chhuak nual a. Heng zingah hian Tribal Power, Dream Hunter leh Albatross te hi a langsar zual an ni ngei ang. Anmahni pual album pawh an siam theuh a, belhchian pawh a dawl hlawm hle. Band han sawitham leh deuh ber chu Terminal kha an ni a, mahse anni hi chuan cover song bak an sa vak lova, an pual album pawh an siam lo niin a lang. A chunga kan tarlan bakah pawh band te nau deuh chu an han piang ve thin tak na a, rei an daih vak ngai lo. Bad Combination hian an daih rei ta phian a, mahse mipui hmaa an inlan tam vak loh avang hian hriat an hlawh lutuk lo niin a lang. Anni hian 70s leh 80s chho vela sap hla hrang hrang an hrut kual a, rual < deuh zawk te lawm an hlawh phian.
Live band ni lo, vocal band erawh tlem a zawng kan nei a, gospel lam hian an ngah zawk niin a lang. Blue Corn tih loh chu Gospel lam vek niin a lang. Zaipawl chi hrang hrang bakah Vohbik te, Kneeling Band te leh Super Trio te pawh kan nei hi a! Zaipawl han sawi kai takah chuan hmar lam zaipawl hian chhim lam zaipawl hi an tluk lo deuh zawkin ka hre tlat zel. Tin, zaipawl lian deuh ho hian hla mak pui pui, har zet zet, lo zawm ve theih mangloh sak an ching a, style-ah an kal ral a, mipui-ah a tla na thei lo niin a lang. Hla sak tur an thlang thiam lo ni berah ka ngai. A reng reng thu-ah music track rema an zai tawh ber chuan solfa vaitu (conductor) hi a tul ber pawhin a lang vak tawh lo a sin mawle.
Tlem lai deuh atang khan Sapram lamah boy band ho an rawn inlar a, New Kids on the Block an ti, Take That an ti. Heng vocal band ho hian thalaite khawvel an rawn phin darh a. An hnung zuiin Backstreet Boys, Westlife, Blue leh band dang engemawzat an rawn inlar chho zel a. Kan fanu te Bedroom bang chu hengho poster hian a khat a ni ber mai. A tlangpui thu in heng boy band ho hi aw lian lo tak, aw no leh nem hli hlei an ni tlangpui. Heng ho hi kan thik zota a ni ber ang chu, tunlai kan zaithiam ho reng reng hian a no thei ang ber a zai an tum ta vek mai chu a nih hi. Aw lian leh pa deuh chu kan ngaisang tawh lo. A sa no thei thei chu kan bawh huam huam tawh mai chu a nih hi.
Technology lama kan hmasawn chak lutuk hian music-ah kan than a ti thu ta tlat mai. Ka duh dan tak phei chuan tunah hian TV aia changkang hi la awm lo se, hei ai hian guitar leh instrument dang khawih kan nal zawkin ka ring. Music track nen ringawta concert neih te hi a zahthlak tihna chang hria ila ka va'n ti tak em! Music hlutna a bo vek a lawm.
Taktak a na tunhnu hian zai thei chhuak thar an tam ta lutuk a, an hming hmerh-a han sawi sen chi pawh an ni lo. Chutih laiin media lamin a chhuak thar apiang kha thiam ber bawlin an bawl a, celebrity thawk in an thaw vek tawh mai thin si a, a hahthlak thei khawp mai. A then lar duh lutuk phei chuan media lam an be tha thei khawp mai te chu an la ti tak deuh deuh a.
West Phaileng tlangval Vanlalsailova te, Darlawn tlangval Joseph Zaihmingthanga te, Republic tlangval Vincy Lalthanpuia Chhangte te, Venghlui nula Liandingpuii te, Khatla nula SP-i te, rock 'n' roller Tommy L.Pachuau leh zaithiam dang engemaw zat te'n media lam tlawn ngai miah lova Pathianin a pek an talent dawn an hman thiam avngin an fakawm thlawt mai. An huhang pawh a n^. An rah chin apiang chu an ram a ni ber mai e. Hnampui ho entawn ta chu inngaihsan leh inchawimawi dan pawh kan thiam chho zel e. Hei hi tun hnu-a kan hmasawnna langsar ber pakhat a ni. Mahse hetih lai hian mi rilru zim, mi reng reng an chhiatna leh an mawi lohna lam ringawt zawng a sawiselna tur lo zawng reng pawl an awm ve zel bawk a, heng ho hian he khawvel hi an tihahthlaka, an mahni pawh an inti hah thlawn a ni.
Tunhma lam kha chuan kan zaithiam neihte reng reng khan aw tliang tha tak an nei deuh zel a, tunhnu erawh hi chuan aw tham te mawi tihna chang kan hre tawh a, aw chhe tak nei pawhin an aw chhia an hmang thiam tawh a, an aw an hman thiam phawt chuan aw chhe ber pawh aw mawi berah a chhuak thei tih hi a tu a te pawh hian kan chiang tlang tawh khawp mai. Entirnan, Zorimawi Khawvela kan chhuan tawlawl Zirsangzela Hnamte kha hlaphuahthiam a nihna mai bakah mi lungleng zaithiam lar ber pawl a tling pha a. A aw erawh a chhe thlawt. A tawng chhuak thei tawk tawk a ni ber a. Amaherawhchu uluk tawk leh a thinlung zawng zawnga a'n zai chiah mai chu ngaihnawm a tling pha. Khatiang mihring kha kei chuan zaithiam ka tih chu a ni.
SP-i hi kan hmeichhe zaithiam zingah chuan aw hmangthiam ber pawl niin a lang. Aw chak lo te, nem tak a nei a, amah Pa Dengchhuana (fam) tawngkam takin a aw chaklo takah chuan 'a ti hurtu' kha a hmangthiam tlat a. He a thil hmanthiam thuruk hian SP-i aw chu ngaihnobei takak a chantir a, a hla sak apiang deuh thaw hit a kai phah ta a nih hi. Hetiang deuh bawk hian Johan H.Lalmalsawma hian a aw chak lo tak a hmanthiam miau avangin Zorimawi Khawvelah dinhmun sang tak a chan phah bawk.
Kan thuziak a sei lutuk loh nan a hmawr kan bawk tawh mai anga, rambuai lai 1966-1986 inkara rimawia kan hmasawn dan han thlirkir hian a lunglen thlak a, 1986-2006 inkara kan hmasawn dan hi chu modern technology vang liau liauah kan puh thei ang. Engpawhnise kan hmasawn chhan chu kawng hrang hrang, a chhan hrang hrang a ni maithei, a tha lam kawnga kan hmasawnna ah hi chuan lawm mai tur kan lo ni e.
