625/2022-2023

“Tunhnaiah daktawr pension 10 chuang kan nei a, zirna sang zawk zir tura kal 10 vel kan neih bakah Court case vangin daktawr 20 dawn lak tura tih pawh kan la thei rih lova, PHC 8 ah daktawr an awm lo bawk nen loh theih lohin daktawrte sawn kual an ngai a, indaihlohna phuhru turin theihtawp kan chhuak mek a, mipuite pawhin kan harsatna tawh hi min hrethiama dawhthei taka min nghak hram hram turin kan ngen tak meuh a ni” – Dr R. Lalthangliana, Minister, H&FW

Aizawl, 25th May, 2022 : Health Minister Dr R. Lalthangliana chuan vawiin khan Human Nutrition & Dietetics Society of Mizoram Annual Conference hman puiin tunlaia daktawr indaihlohna avanga harsatna an tawh thu leh a su kiang tura theihtawp chhuaha kawng hrang hrang an dap thu a sawi.

Taxation Department Auditorium, MINECO-a he hun buatsaihah hian thu sawiin Health Minister chuan kum 2019 atang tawh khan Health Department-a doctor leh post chi hrang hrang hnawh khat turin hma an lak thu a sawi a, he hna lak tur atan hian Chief Minister ngei pawhin phalna min pek vek tawh laiin vanduaithlak takin Covid 19 hripui a rawn thleng a, hna lak kalpui theih a ni ta lo, a ti a. Tun hnaiah doctor 20 dawn lakna tur atan Finance leh DP&AR phalna te la a recruitement tih tum a nih laiin Court case avangin recruitment kalpui chhunzawm theih a ni ta lo va, hei hian harsatna nasa tak min thlen a, chu bakah tun hnai thla 6 kal ta chhung hian doctor 10 chuang zet an pension bawk a. Zirna sang zawk (further studies) chhunzawm turin doctor thawk lai 10 chuang an chhuah a ngai leh bawk a. Heng kalchhuak ta te Mizoram tana la pawimawh tur an nih avangin hnar theih an ni lo va. Heng te avangin PHC leh hospital hrang hrangah doctor indaihlohna a nasa em em a, hetiang hi Mizoramah a la thleng zen zen ngai lo, a ti a. Doctor post ruak tam tam takte hnawh khat tur hian hma an lak reng thu leh an harsatnate chinfel a harsat hu sawiin, tunah hian damdawi in tam takah post eng emaw zat a ruak mek a, PHC 8 ngawtin daktawr an nei ta lova, hemi avang hian daktawr kan neih sate siksawi an ngai a, daktawr senior thenkhat pawh hmun hla zawkah kan transfer te an awm hial a, rampuma kan dinhmun harsa tak hi hrethiama, doctor nei lo khua, mipuite leh pawl te pawh kan harsatna tawh mek hi dawhtheihna nen min hrethiam turin ka ngen tak meuh a, hna lak kawnga kan mutan pawh hi chin fel vat a nih kan beisei tlat a ni, a ti.

Hrisel leh damrei tur chuan ei leh in kan uluk a pawimawh tih sawiin Dr R. Lalthangliana chuan hriselna atana tha tur ei leh in hi a Pathian thu em em a, Bible in kan taksa enkawl uluk tura min zirtirna pawhn hi ei leh in atanga kan tan a ngai a ni a ti a. Tui kan tih zawng a nih vanga ei teuh hi chin loh a tha a, kan taksa mamawh tawk ang zela insum kan thiam a pawimawh a, kan ei leh in mila taksa kan sawizawi thin a pawimawh hle a ni,a ti bawk.

Dr Thangtea chuan sawrkar hnathawk kan ni emaw, private firm a thawk kan ni emaw, mahni ktkawiha eizawng kan ni emaw kan hrisel loh chuan hna tha takin a thawh theih loh a, hrisel tha tur chuan a hmasa berah ei leh in kan uluk a ngai a, natna inkaichhawn theih loh (non-communicable diseases) zunthlum, thisen sang, stroke etc. nei kan tam takah hian ei leh in bakah taksa insawizawi uluk kan mawhna min hriatchhuah turtu ni se ka duh hle, a ni a ti bawk.

Human Nutrition & Dietetics Society of Mizoram hi kum 2014 khan din niin March ni 15, 2016 khan Firms & societies ah an in register a, he ni hi an rising day atan an pawm chhunzawm nghal a ni.

Vawiin Annual Conference-ah hian sawihona hun tha tak neih a ni a, Mizorama thali leh theirah tual to kan neihte hi ram pawn atanga man to tak taka kan lakluh te ang bawkin hriselna kawngah ei atana tlak leh tha zawk an nih avangin Mizoram thali leh theirahte hnualsuat lova ei uar zual sauh sauh a pawimawhzia mipuite hnena a tam thei ang ber zirtir a that thute, Mizo chawhmeh - bai, sa um, bekang u, ai-um etc. te hi uluk zawka zirchianna neih a calories, proteins, fats etc., a pai dante hriatchian a pawimawh thu sawi lan a ni bawk. Sawrkar department hrang hrantgte nen tangruala mipuite hnena ei tur hrisel inzirtirna kalopui dan ngaihtuah a that thu sawi lan a ni bawk a ni.

Human Nutrition & Dietetics Society of Mizoram Annual Conference hi an President Dr Pachuau Lalmalsawma’n a kaihruai a, Pi Zoramthangi Chhangte, Jt. Director, Women & Child Development leh Dr Lily Chhakchhuak, SPO, RCH+N ten thu sawina hun an hmang a, Lalhmangaihi Zote, General Secretary, HNDSM in report pe in, HNDSM Vice-President HT Lalruatdiki’n “Nutrition for Public Health” tih thupui hmangin presentation a pe a ni.

He Conference ah hian kohhran hrang hrang aiawh, NGO leh College aiawhte telin chawhnu lamah seminar an nei a ni.