Tunlaia vawk natna chikhat Porcine Reproductive Respiratory Syndrome (PRRS) vanga Champhai District a vawk thihna thleng chungchanga Serchhip District dinhmun leh lo hmachhawn dan tur ngaihtuahin vawiin chawhnu khan Serchhip Bawrhsap Pisa ah Bawrhsap Dr. Lalrozama hovin Vety Department hotute leh official pawimawh dangte an inhmukhawm.

District Bawrhsap chuan Serchhip District chu khawchhak lam atanga ran tawlhluttu ten an tantlang ber anih avangin leh vawk pul hri avanga vawk thihna a thlen tak bawk si avangin mipuite an chi-ai loh nan leh heng laka kan inven theih nan hma lak vat a tul tih sawiin abik takin Champhai District hnaih deuh khua ten hlauhthawn an nei ani a ti a, mipuite thlamuan tur leh heng vawk pul hri avanga harsatna kan tawh loh nan hma lak vat a tul ani tih a sawi bawk.

Dr. Lalnghinglova, DVO, Serchhip chuan PRRS hi boruak atanga inkaichhawn theih (air-borne) anih avangin thli tam lai phei chuan inven uluk a tul lehzual a ni a ti a, nipui thaw chho, fur ruahtui tlak hma hian a hkluar duh bik thin tih sawiin North Vanlaiphai leh Thenzawlah pawh Vawk thi report an dawn tawh thu uluk taka an endik thu te, hmunpui lama zirchian tura an thawn tawh thu leh mipui tan chi-ai na tur a awm rih loh thu a sawi.

Vawiin District Bawrhsap hova thukhawm chuan Serchhip District mipuite chu tunlai District thenawma vawk natna hri a len avanga chi-ai lo tura chahin engemaw chen chu District pawn lam atanga vawk la lut rih lo turin a ngen nghal a, thuneitute thu leh hla ngaichang turin a ngen bawk a ni.

AH & Vety. Department, Serchhip District pawhin engtiklai pawha mipuite tanpui tura an inpeih reng thu sawiin vawk damlo emaw thi emaw an neih chuan a rang thei ang bera Dispensary hnai ber emaw Rural Animal Health Centre hnai ber emaw pan turin mipuite an chah a, mahni remhriat dan ang ang a lo buaipui mai lo turin vawk vulhtute a ngen a, vawk thi an neih chuan phum emaw halral emaw ngei ngei turin an chah bawk. PRRS laka inven dan tur leh vawk damlo enkawl dan tur District chhunga Village Council tin te hnenah hriattir tum a ni bawk.