Vawiin chhun khan kum 2016-2017 chhunga Serchhip District Education Committee thutkhawm hmasa ber chu an Chairman, District Bawrhsap ni bawk Dr. Lalrozama, IAS pisa ah neih a ni a, kum 2015-2016 chhunga hmalaknate leh sum hman dan te an thlirho a ni.

Kum 2015-2016 chhunga hmalakna tur ruahman “Programme of Action” kalpui anih dan Pu R.Lalawmpuia, Dy. DPC, SSA Mission Serchhip District in report kimchang pe in SSA Mission, Serchhip District hnuaia zirtirtu rawih te kum 2015-2016 hlawh chu April, 2016 khan pek kim vek an ni a, zirlai naupang 4420 tan school uniform grant Rs. nuai 17.68 hmuh niin heng sum te hi School Management Committee hnenah release ani tawh bawk a ni. Zirlaibu a thlawna sem “Free-text book” hi subject thenkhat indaihlohna avangin sem kim loh a ni a, indaihlohna te hi hotulian te hnenah thlen niin tun thla chhung hian hmuh kim hman beisei a ni bawk. Kum 2015-2016 chhungin Government School leh Government-Aided Primary & Middle School 135 hnenah School Grant pek niin Primary School pakhat tan Rs 5000/- theuh leh Middle School pakhat tan Rs. 7000/- theuh School Management Committee kaltlanga pek an ni a, Government Primary School leh Government Middle School 125 hnenah Maintenance Grant Rs. 7500/- theuh pek an ni bawk.

Intervention of Children With Special Need atang Rs. nuai 13.797 hmuh niin District chhunga sikul hrang hrang atang naupang 293 Specialist Doctor te chekup tir an ni a, tarmit mamawh naupang 193 hnenah a thlawna tarmit pek niin CWSN naupang 42 sikul a hruai ngai te hnenah escort allowances thla 10 chhung atan Rs 2500/- theuh pek an ni. Mizoram SSA Mission leh TATA Trust tangkawpin Grassroot Football Academy Training Centre 60 a din turah Serchhip District ah Centre 7 din tur a ni a, a hmun atan Serchhip Hmar Veng, New Serchhip, Chhiahtlang, Chhingchhip, Thenzawl, Khawlailung leh North Vanlaiphai thlan niin a enkawltu tur District Level Management Board pawh din ani tawh a, heng Training Centre hrang hranga Trainer tur te pawh lak fel vek an ni tawh a ni. Kum 2015-2016 chhungin midday meal tluang taka kalpui a ni a, enrolment pun vang leh bungbel nei tha tawh lo sikul 6 hnenah tanpuina Rs 4000/- theuh pek an ni a, Choka nei tha lo sikul 5 hnenah choka sakna tur Rs nuai 2 theuh pek an ni bawk.

DEC Chairman Dr. Lalrozama chuan Serchhip District SSA Mission te hnathawh dan chu chhuanawm a tih thu leh fak tlak an nih thu a sawi a, Mizorama SSA Mission hnathawk tha ber pawl an ni tih report awm te chu lawmawm a tih thu a sawi bawk. NGO hruaitute pawhin Serchhip SSA Mission hmalakna fakawm an tih thu sawiin lungawithlak an tih thu an sawi a, YMA te pawhin abik takin Grassroot Football Academy Training Centre hlawhtlinna tura theihtawp chhuahpui an tum thu an sawi a ni.