Sorkar laipui ruahmanna in India ram pumah Cable T.V Network chu Analog atangin Digital-ah thlakthleng mek a ni a. Tunah hian State lian zawkah thawh khatna leh thawh hnihna thawh zawh tawh a ni a. Thawh thumnaah Mizoram State telh a ni a. Dt.31st December, 2015 hian zawhfel hman tum a ni.
Digital T.V anih tawh dawn avangin Set Top Box hmangin TV hi en tawh tur a ni a. Dt. 31st December, 2015-atang chuan Cable TV hi digitalised vek anih tawh dawn avangin Set Top Box neilo chuan Cable TV a en theih tawh lovang. Set Top Box hman anih hunah chuan a hma aiin picture a fiah ang a, Channel a tam bakah mahni channel duhzawng a lei (thlan) theih dawn a ni. Mipui tana zawm tur dan kimchang la puanzar chhunzawm zel ani ang.
Cable TV Digitization hi hmasawnna tamtak thlentu tur a ni a, Internet connection a tichak dawn a. Central leh State Sawrkarin digitization hmang hian sum (chhiah) mumal takin a hmuh belh dawn a ni. Phase-I leh phase-II thawh zawh tawhna hmun state lianah a thatzia a takin hmuh a ni tawh a, India ram pumah digitization hna hi Task Force siama mumal taka kalpui mek a ni. Mizoram sawrkar pawhin Multi System Operator (MSO) te nen Cable digitization hna hi an thawk ho mek a ni.
