Nimin khan Kolasib DC Pu H. Lalengmawia, IAS chuan Saipum khua a tlawh a, khawtlang hruaitute chu an khua leh mipui mimir harsatna leh hnufualna te chipchhiar takin a zawt a, a hmuna amah tawiawmtu Department hrang hrang aiawhte chu thil awmdan te zawtin a theih anga kawng dappui turin leh hma lak pui turin a hrilh a ni a.
Saipum khawtlang hian DC lawmna programme hi Saipum Community Hall ah an buatsaih a, he programme ah hian Kolasib DC Pu H. Lalengmawia, IAS chuan Saipum khua chu khaw hlui, kum za hmel lo hmu ve tawh a ni a tiin khawtlang lungrual, thawhhona nei tha, taima leh Zofate inpumkhatna atana thawhhlawk tak nia a hriat thu te a sawi a. Khaw mipui te chu an rilru sutthlek te siam tha a, khawtlang hmasawnna atan rilru leh ngaihtuahna te senga hma lam hun pan turin a chah a. Zirna chu hmasawnna engkim bul anih dante sawiin DC chuan he hunah nu leh pate kalkhawm chu an fate zirna ngaihsaka, kawng engkim an fate zirna tih hma sawn zawnga fuih thin turin a chah a. Retheihna hi tumruhna leh mihringte rilru nei tir tu hmanraw pawimawh tak nia a hriat thu te sawiin retheihna avanga mangang mai lova kawng engkim mahni inrintawkna, taimakna, rinawmna leh tuarchelna nen nunah harsatna awm thin te chu hmachhawn turin mipuite chu a chah a ni.
DC chuan Saipum chu ramri depa awm anih avangin an chetzia leh an hawiherhna lamah te hnamdang te tan entawntlak ni thin turah ngenin engemaw avanga dan chu lek kawh mai lova, zawl dawh taka hotu te kutah heng chu dahthiam turin a chah a. Hnam leh hnam, chi leh chi inthlairna paih bo a hun tawh thu te sawiin DC chuan an khaw chanchin a tha zawnga Mizoramin a hriat theih nan an rilru siam turin a ngen bawk a ni.
Saipum khaw mipuite ten an khua a Bank ah awm loh avanga harsatna an tawh an thlen chu DC chuan a theih anga anga hotu lian te sawipui a tum thu hrilhin NEEPCO Tuirial site-ah SBI in bank an dah tur chu Saipum leh a chhehvel khua tena an hman tangkai ve theih turin NEEPCO hotute a sawipui tur thu te a hrilh bawk a ni.
Hemi hnu hian Pu H. Lalengmawia chuan NEEPCO in Turial ah MW 60 pechhuak thei Hydro electric project an sak mek chu a tlawh a. NEEPCO Turial site a hotu te hian DC hi dawngsawngin an hnatawh tawh chin hmun hrang hrang - tunnel, spillway, dam site leh power house an sak mek an tlawh kual pui a. DC chuan NEEPCO hmalakna chu hun reilotea, a taka chhawr theih anih hunah chuan Mizoram tan thil ropui leh mipui te tan ro a ni dawn tiin NEEPCO hotute chu a hrilh a. Kawng hrang hrang Tuiral power project chhehvelah khua te CSR kaltlanga an tanpui thin naah te lawmthu hrilhin mipui te puihna thinglung pu reng turin a ngen a. An area chhunga nakina lawka SBI Branch hawn tur chu a chhehvel khua te an chhawr tangkai theih nan inhawng takin hma lak sak turin a ngen a. NEEPCO hotute chu harsatna an nei em tih a zawh chu NEEPCO hotute te hian chutiang engmah an neih loh thu hrilhin Mizoram chu state ralmuang leh muanawm anih avanga hnathawk te chu rilru nuam takin an thawk thei a, mipui leh Sawrkar tawimawmna chu fakawm leh ropui an tih thu DC hi an hrilh a ni.
DC hi Department hrang hrang aiawhte leh MJA Kolasib District hruaitu ten an tawiawm a ni.
